Tarazda kópqabatty úıdiń turǵyndary evakýatsııalandy
TARAZ. KAZINFORM - Taraz turǵyndary polıtseılerdiń adamdardy órtten qutqarǵan sáttegi beınejazbasyn jarysa jarııalap jatyr. Kadrlardyń birinen polıtseıdiń jaraqattanǵan aıaǵyna qaramastan úı turǵyndaryn evakýatsııalaýdy jalǵastyrǵanyn kórýge bolady.
«Ol aıaǵyn qaıyryp alýy múmkin», «Aqsap turǵanyna qaramastan, janyp jatqan páterge júgirdi», «Bárekeldi! Naǵyz jigit eken!» dep jazdy jeli qoldanýshylary.
Jambyl oblystyq Polıtsııa departamenti taratqan aqparatqa súıensek, órt shyqqan páterde kámeletke tolmaǵan bes bala men olardyń anasy bolǵan. Turǵyn úıden barlyǵy 60 adam evakýatsııalanǵan.
«2024 jyldyń 13 mamyryna qaraǵan túni polıtsııa departamentiniń kezekshi bólimine qońyraý soqqan áıel adam kórshi páterde órt bastalǵanyn habarlady. Kórsetilgen mekenjaı boıynsha jaqyn mańdaǵy patrýl jasaǵy kidirtpeı jiberildi. Oqıǵa ornyna birinshi bolyp kelgen polıtsııa qyzmetkerleri órt oshaǵyn joıyp, áıeldi jáne onyń bes kámeletke tolmaǵan balasyn aman alyp shyqty, olardyń eń kishisi nebári 2 jasta», - delingen Polıtsııa departamenti habarlamasynda.
Budan ári polıtsııa qyzmetkerleri jarylysty boldyrmaý úshin páterdegi gazdy jaýyp, osy kópqabatty turǵyn úıdegi basqa da adamdardy evakýatsııalaǵan.
