Tarazda kópbalaly jáne az qamtylǵan otbasylar baspanaly boldy
«Báıterek» shaǵyn aýdanynan boı kótergen 15 páterli 6 kópqabatty turǵyn úı «Nurly jer» memlekettik baǵdarlamasy aıasynda salynǵan. Merdiger – «Bınom» JShS.
Jańa qonys toı ıeleriniń qatarynda memlekettik qordan páter alý kezek tizimine tirkelgen kópbalaly, az qamtylǵan, múmkindigi shekteýli jandar jáne taǵy basqalar bar.
Jambyl oblysynyń ákimi Berdibek Saparbaev saltanatty sharaǵa arnaıy qatysyp, páter kiltterin tabystap, quttyqtady.
«Halyqty turǵyn úımen qamtamasyz etý – memleket saıasatynyń basym baǵytynyń biri. 30 myńnan astam jambyldyq turǵyn úı kezeginde tur. Memleket basshysynyń tapsyrmasyna sáıkes, eń aldymen kópbalaly jáne az qamtylǵan otbasylar, múmkindigi shekteýli jandardy baspanamen qamtý mańyzdy. Sonymen qatar, biz turǵyn úı máselesin sheshý úshin jergilikti kásiporyndardyń múmkindikterin paıdalanýdamyz, barynsha jan-jaqty jumystar júrgizýdemiz. «Asarlatyp úı salý» jobasy sheńberinde jaqsy nátıjege qol jetkizýdemiz. Atalǵan jobamen ótken jyly aýyldastarynyń kómegimen 99 muqtaj otbasy baspanaly bolsa, bıyl 134 úıdiń qurylysy bastalyp, birtindep paıdalanýǵa berilýde. Óńirde «Baqytty otbasy», «Shańyraq» baǵdarlamalary boıynsha da tıisti jumystar júrgizilýde», - dedi Berdibek Saparbaev.
Aımaq basshysy qala turǵyndaryn sanıtarlyq-epıdemıologııalyq talaptardy qatań saqtaýǵa, óz densaýlyǵyna muqııat bolýǵa shaqyrdy jáne vaktsınatsııanyń tolyq kýrsy ǵana ınfektsııadan saqtanýdyn jalǵyz joly ekendigin jetkizdi.
Sóz sońynda Berdibek Saparbaev jańa qonystoı ıelerin qýanyshtarymen quttyqtap, qut-bereke, amandyq tiledi.
Bul kúndi 14 jyl kútken kópbalaly ana, birinshi toptaǵy múgedek Saǵatkúl Kenjebekova óz qýanyshymen bólisti.
«Búgin biz úshin óte erekshe kún. Sebebi bul kúnde qanshama jyl kúttik. Baspanaly bolǵanymyzǵa qýanyshtymyn. Balalarǵa da jańa aýdan qatty unady. Osyndaı qoldaý úshin memleketke alǵysymyz sheksiz»,- deıdi ol.
