Tarazda kóp balaly otbasylar men jetim balalar baspanaly boldy
Jańa 15 shaǵynaýdanda ornalasqan turǵyn úıdiń ıegerleri - kóp balaly jáne az qamtylǵan otbasylar, jetim balalar jáne basqa da áleýmettik osal toptaǵy azamattar. Jańa úıde úsh bólmeli 15 páter, eki bólmeli 55 páter, bir bólmeli 10 páter.
Kóp jyl boıy kezekte turǵandar berligen páter kiltterin tapsyrý saltanatyna Jambyl oblysynyń ákimi Berdibek Saparbaev arnaıy qatysty.
«Turǵyndardyń turǵyn úı máselesin sheshý úshin memleket túrli baǵdarlamalar qabyldady. Ótken jyly Tarazda eki myńǵa jýyq páter berilse, búgin de sol ıgi dástúr óz jalǵasyn tabýda. Bul Halyqaralyq áıelder kúni qarsańynda bizdiń áıelder men kóp balaly analar úshin erekshe syılyq bolyp otyr. Barshańyzdy jańa qonystaryńyzben quttyqtaımyn, myqty densaýlyq, uzaq ómir tileımin», - dep atap ótti aımaq basshysy.
« 10 jyl boıy biz páter jaldap, ary-beri kóshýmen boldyq. Endi kópten kútken eki bólmeli páterge qol jetkizip otyrmyz. Qýanyshymdy sózben aıtyp jetkize almaımyn. Bul úshin rahmetimdi bildirgim keledi»,- deıdi Jansaıa Ábdiraıymova. Bul kúni alty balanyń anasy Ǵalııa Shegeeva da qonys toıyn atap ótti. Ol da otbasynyń, balalarynyń júrekjardy qýanyshyn aıtyp, aǵynan jaryldy.
Qala ákimdiginiń málimetinshe, «Nurly jer» baǵdarlamasy aıasynda aǵymdaǵy jyly 29 kópqabatty turǵyn úıdiń qurylysy júrgizilýde. 2025 jylǵa deıin jańa turǵyn úı alabynda barlyǵy 181 kóp páterli jáne 255 jeke turǵyn úı salý josparlanýda.
Aıta ketý kerek, «Baqytty otbasy» baǵdarlamasy aıasynda ótken jyly oblys boıynsha 323 páter berilgen-di. Sonymen qatar, «Qarasý» shaǵynaýdanynda kóp balaly otbasylarǵa arnalǵan 4 kóp qabatty áleýmettik jataqhana salynǵan bolatyn. «Araı» shaǵynaýdanynda taǵy sondaı tórt jataqhananyń qurylysy júrgizilýde.
Qazirgi ýaqytta turǵyn úı kezeginde shamamen 19 myń adam tur. Onyń 2 myńǵa jýyǵy kópbalaly otbasy.
