Tarazda Konstıtýtsııa kúninde turǵyn úı men balabaqsha ashyldy

TARAZ. QazAqparat - Búgin Jambyl oblysynyń aýdandary men oblys ortalyǵynda jańa áleýmettik nysandardyń kiltteri saltanatty túrde tabys etildi.

Óńir basshysynyń baspasóz qyzmetinen habarlaǵandaı, Tarazda Jambyl oblysy ákiminiń orynbasary Bekbolat Orynbekov  «Araı» turǵyn úı alabyndaǵy 80 páterlik úıdiń jańa ıelerine kilt tabys etti. «Agrospetsstroı» JShS qurylysty 2015 jyly bastaǵan. Jyl aıaǵyna deıin taǵy bir kóp páterli turǵyn úıdi tapsyrýdy josparlaýda.

Jańa «Balbulaq» balabaqshasynyń saltanatty ashylý rásimi «Saltanat» shaǵynaýdanynda ótti.

280 oryndyq mektepke deıingi mekeme Sarysý aýdanynyń Jańatas qalasynda, sondaı-aq Qordaı aýdany Masanshy aýylynda ashyldy, 200 oryndyq balabaqsha Shý aýdany Shý qalasynda paıdalanýǵa berildi.

Tutastaı alǵanda, QR Konstıtýtsııasy kúnine oraı «Nurly jol» baǵdarlamasy boıynsha óńirde oblystyq bıýdjet esebinen 5 mektep, 4 balabaqsha tapsyryldy.