Tarazda «Kóne shahardaǵy myń bir tún» atty mýzeı túni ótti
TARAZ. QazAqparat – Tarazda «Ejelgi Taraz» tarıhı-mádenı qoryq-mýzeıi ujymynyń uıytqy bolýymen «Kóne Taraz» tarıhı-mádenı kesheninde «Kóne shahardaǵy myń bir tún» atty mýzeı túni is-sharasy ótti. Oǵan qala turǵyndary tún aýǵansha kelip, tamashalady, dep habarlaıdy QazAqparat tilshisi.
Іs-sharanyń ashylý saltanatynda «Ejelgi Taraz» tarıhı-mádenı qoryq mýzeıiniń dırektory Nurlan Byqybaev kirispe sóz sóılep, kelýshilerge rızashylyǵyn jetkizdi. Tarıhtan tamyr tartqan jádigerlerdi jurtshylyq qyzyǵa tamashalady. Ásirese túrli teatrlandyrylǵan qoıylymdar jurtshylyqtyń júregine jetti. Óıtkeni onda da tarıhtyń tańbasy bar. Budan soń oblystyq qazaq drama teatrynyń dırektory Bolat Bekjanov, oblystyq ardagerler keńesiniń múshesi Saılaýhan Ashanov, «Ordabasy» memlekettik tarıhı-mádenı qoryǵynyń qyzmetkeri Baqytbek Qasymov, «Tańbaly» memlekettik qoryq-mýzeıiniń qyzmetkeri Qýanysh Nurmaqsutov syndy azamattar joǵary deńgeıde uıymdastyrylǵan is-sharaǵa kóńilderi tolǵanyn jetkizip, alǵystaryn aıtty.
«Mýzeı túni» teatrlandyrylǵan qoıylymynyń baǵdarlamasyna kelýshiler bul kúni kópester men qolóner sheberleri ornalasqan qalashyqqa sapar shegip, Qarahan men Aısha bıbiniń tarıhyna úńildi. Mýzeı keńistigindegi qaıta jandanǵan tarıhı tulǵalarmen bir qatarda júrip, túrli tústi ınstallıatsııa aıasynda estelik fotoǵa tústi. Osylaısha shahardyń ótkeninen mol málimet aldy. Keshki saǵat 20:00 men 03:00 aralyǵyn qamtyǵan is-sharaǵa úsh myńnan astam adam kelgenin aıta ketken lázim. Osynaý is-sharaǵa asa belsendilikpen qatysqan azamattar sońyra Alǵys hattarmen, baǵaly syılyqtarmen marapattaldy.
