Tarazda kóliktiń bagajynan 4 qap keptirilmegen marıhýana tabyldy

ASTANA. KAZINFORM — Esirtki zattarynyń jalpy salmaǵy 24 keliden asady, dep habarlaıdy Polisia.kz.

Óńirde «Qarasora» jedel-profılaktıkalyq is-sharasy ótkizildi. ІІM Esirtki qylmysyna qarsy is-qımyl komıtetiniń jáne Jambyl oblysynyń polıtsııa departamenti esirtki qylmysyna qarsy is-qımyl basqarmasynyń qyzmetkerleri esirtki zattaryn zańsyz tasymaldaǵan kúdiktiler tobyn quryqtady.

Jedel aqparat boıynsha Taraz qalasyna kirgen Audi-80 kóligi toqtatyldy, kólikte tórt jergilikti turǵyn bolǵan. Quqyq qorǵaý qyzmetkerleri kóliktiń bagajynan 4 qap keptirilmegen marıhýana tapty. Alynǵan esirtki zattarynyń jalpy salmaǵy 24 keliden astam. Aldyn ala alynǵan málimetterge súıensek, marıhýana Turar Rysqulov aýdanynyń qumdy aımaǵynda daıyndalǵan.

— Osy fakti boıynsha QR Qylmystyq kodeksiniń 296-baby 4-bóligi boıynsha tergeý amaldary bastaldy. Qazirgi ýaqytta kóliktegi eki jolaýshy ýaqytsha ustaý ızolıatoryna qamaldy. Qalǵan kúdiktilerge qatysty qajetti tergeý sharalary júrgizilip jatyr. Kúdiktilerdi ustaý is-sharasyna Jambyl oblysy prokýratýrasy qatysqan, — delingen habarlamada.

Quqyq qorǵaý organdary oblys aýmaǵynda esirtkiniń zańsyz aınalymyn anyqtaý jáne toqtatý boıynsha belsendi jumystar júrgizip jatyr.

Budan buryn Jambyl oblysynda nashaqorǵa úkim shyǵarylǵanyn jazǵanbyz.