Tarazda kólik júrgizý quqyǵynan aırylǵan turǵyn qaıtadan mas bolyp rólge otyrǵan
TARAZ. QazAqparat – Taraz qalasynyń patrýl polıtseıleri mas kúıinde kólik júrgizgen 46 jastaǵy jergilikti turǵyndy ustady, dep habarlaıdy QazAqparat tilshisi.
Atalǵan derek QR QK 346-baby 1-bóligi boıynsha tirkelgen.
Buǵan deıin er adamnyń mas kúıinde kólik basqarǵany úshin ákimshilik jaýapkershilikke tartylǵany, sol úshin úsh jylǵa kólik basqarý quqyǵynan aıyrylǵany anyqtaldy.
Osyǵan qaramastan, ol dosyna barý úshin taǵy da kólik róline otyrǵan. Bul týraly oblystyq polıtsııa departamentiniń baspasóz qyzmeti habarlady.
«Sotta er adam kinásin tolyq moıyndady jáne jasaǵan isine ókindi. Sot úkimimen er adamdy ómir boıy kólik quralyn basqarý quqyǵynan aıyra otyryp, 200 saǵattyq qoǵamdyq jumys túrindegi jaza taǵaıyndaldy» delingen vedomstvo habarlamasynda.
