Tarazda kóligimen aǵashqa soǵylǵan 25 jastaǵy júrgizýshi qaza tapty
TARAZ. QazAqparat – Taraz qalasynda júrgizýshi kóligimen talǵa soǵysyp qaza tapty, dep habarlaıdy QazAqparat.
Oqıǵa tańǵy saǵat 05.30 shamasynda oryn alǵan. «Lexus GS 300» markaly avtokóliginiń 25 jastaǵy júrgizýshisi oblys ortalyǵyndaǵy Jeltoqsan kóshesi boıymen Beıbitshilik kóshesine qaraı kele jatyp, rólge ıe bola almaı, joldyń jıegindegi aǵashqa soqtyǵysqan. Bul týraly oblystyq polıtsııa departamentiniń baspasóz qyzmeti habarlady.
«Aldyn ala málimet boıynsha, júrgizýshiniń tizginge ıe bola almaı qalýyna aýa raıynyń qolaısyzdyǵy sebep bolǵan. Jol-kólik oqıǵasy saldarynan júrgizýshi oqıǵa ornynda kóz jumdy. Al, 28 jastaǵy jolaýshy túrli dene jaraqatymen Taraz qalalyq aýrýhanasyna jatqyzyldy» delingen vedomstvo habarlamasynda.
Atalǵan faktige qatysty QR QK 345-baby 3-bóligi boıynsha sotqa deıingi tergeý bastalǵan. Avtokólik arnaıy turaqqa qoıylǵan. Sondaı-aq, tıisti saraptamalar taǵaıyndalǵan.
