Tarazda qoǵamdyq kólikterde elektrondy bılettendirý júıesi engizildi
TARAZ. QazAqparat – Taraz qalasynda qoǵamdyq kólikterge elektrondy bılettendirý júıesi engizildi,- dep habarlaıdy QazAqparat tilshisi.
Tarazda 8 qazannan bastap «TulparCard» elektrondy tólem kartalaryn almaǵan jolaýshylar úshin qoǵamdyq kólikterde jol júrý aqysy 130 teńge, oqýshylar úshin 65 teńge bolyp belgilendi. Atalǵan elektrondy kartany satyp alǵan jaǵdaıda jol aqysy eresekter úshin 65 teńge, oqýshylar úshin 30 teńge kóleminde bolady. Atalǵan kartalardy satý jáne teńgerimge toltyrý boıynsha 16 pýnkt ashylǵan.
Taraz qalasynyń ákimi Ashat Esenalıevtiń aıtýynsha, Taraz qalasyndaǵy qoǵamdyq kólikterge elektrondy bılettendirý júıesin engizýdiń jumys jospary bekitilgen jáne jumys josparyna sáıkes tómendegi jumystar atqarylýda.
«Búginde Taraz qalasy ákimdiginiń dıfferentsıaldy tarıfti bekitý týraly qaýlysy bekitilip, Ádilet organdarynda tirkeldi. Qaýlyǵa sáıkes elektrondy jolaqysyn tóleý úshin tarıf kólemi – 65 teńge, qolma-qol tóleý tarıf kólemi – 130 teńge bolyp belgilendi. Jolaqysyn tóleýdiń avtomattandyrylǵan júıesiniń jumysyna qajet barlyq qurylǵylardy (termınaldar, valıdatorlar jáne basqa da qosalqy bólshekter) óndirýshi zaýytpen kelisimshart jasalǵan»-dedi A.Esenalıev.
«Ortalyq dıspetcherlik qyzmet» JShS dırektorynyń orynbasary Mıras Sádýaqasovtyń baıandaýynsha, Qiwi tólem termınaldary arqyly kartalarǵa teńgerim toltyrý múmkindigi iske qosylǵan. Aldaǵy ýaqytta Kassa-24 termınaldary jáne birqatar bankterdiń mobıldi qosymshalary arqyly teńgerim toltyrý múmkindigin qosý josparlanyp otyr.
Sondaı-aq, júıeniń resmı aqparattyq veb-saıty ázirlenip, qoldanysqa berildi. Qazirgi ýaqytta júıeniń ataýy «tulparcard» dep ózgerýine baılanysty veb-saıtta qaıta óńdeý jumystary júrgizilýde eken. Saıt arqyly kartalarǵa onlaın rejımde tapsyrys berýge bolady. Ol úshin barlyq qajetti aqparat (foto, aty-jóni, JSN) usynyp, banktik karta arqyly tólem jasaý qajet. Daıyn bolǵan kartany qyzmet kórsetý ortalyǵynan alady.
