Tarazda qoǵamdyq kólikte júrý quny 20 teńgege qymbattady
TARAZ. QazAqparat – Taraz qalasynyń qoǵamdyq kólikterinde jol júrý aqysy 20 teńgege qymbattady,- dep habarlaıdy QazAqparat tilshisi.
Bul týraly Taraz qalasy ákimdiginiń baspasóz qyzmeti habarlady.
«Taraz qalasy ákimdiginiń 2021 jylǵy 20 sáýirdegi №1547 qaýlysyna sáıkes, aǵymdaǵy jyldyń 4 mamyrynan bastap Taraz qalasynda qoǵamdyq kólikterde jol júrý aqysyn elektrondyq jol júrý kartasy arqyly qolma-qol aqshasyz tóleý kezinde barlyq jolaýshylar úshin – 85 (seksen bes) teńge, mektep oqýshylaryna (1-11 synyp) – 40 (qyryq) teńge bolyp belgilendi» delingen ákimdiktiń habarlamasynda.
Aıta ketý kerek, buǵan deıin shahardaǵy qoǵamdyq kólikterde elektrondyq jol júrý kartasy arqyly tólem quny – 65 teńge bolyp kelgen.
Sondaı-aq, habarlamada qolma-qol aqshamen tóleý tarıfiniń kólemi barlyq jolaýshylar úshin – 130 teńge, mektep oqýshylaryna – 65 teńge kóleminde ózgerissiz qalatyndyǵy aıtylǵan.
