Tarazda qoǵamdyq kólik jumysy qaıta jandanady
TARAZ. QazAqparat – Taıaý kúnderi Tarazda qoǵamdyq kóliktiń qyzmetin qaıta jandandyrý josparlanyp otyr. Tıisti sheshimdi oblystyq jedel shtab qabyldady, dep habarlaıdy QazAqparat oblys ákimdiginiń resmı saıtyna silteme jasap.
Ol úshin tasymaldaýshy kompanııalar marshrýt avtobýstary men parkterdi Bas memlekettik sanıtarlyq dárigeriniń qaýlysymen belgilengen barlyq sanıtarlyq-epıdemıologııalyq talaptarǵa sáıkes keltirýi kerek. Osydan keıin ǵana avtoparkter qyzmetin qaıta bastaýǵa ruqsat ala alady.
Atap aıtqanda, avtobýs salonyna medıtsınalyq betperde kıgen jolaýshylar ǵana kirý tıis. Jolaýshylardyń araqashyqtyǵy keminde 1 metr bolýy kerek. Salonnyń toltyrylýy 50 paıyzdan aspaýy tıis.
Avtoparkter ákimshiligi personalǵa jeke qorǵaný quraldaryn paıdalaný boıynsha nusqaý berýdi, dene qyzýyn ólsheý boıynsha kúndelikti medıtsınalyq tekserýdi uıymdastyrýy qajet. Jiti respıratorlyq ınfektsııa belgileri bar qyzmetkerler jumysqa jiberilmeıdi.
Sondaı-aq, marshrýttyń aıaqtalýy boıynsha aıaldaý kezinde avtobýs salonyn barynsha jeldetý, dezınfektsııalyq súlgi nemese eritindiimen tereze, tutqalardy, oryndyqtardy jáne ózge de tustardy súrtý kerek.
Aýysym aıaqtalǵannan keıin qoǵamdyq kólik mindetti túrde dezınfektsııalanýy tıis. Aıaldama keshenderin, avtoparkterdi óńdeý kúnine keminde 1 ret júrgizilýi tıis.
Arnaıy monıtorıng toptary osy sanıtarlyq talaptardyń saqtalýyn qadaǵalaıdy.
