Tarazda qoǵamdyq talqylaýdan keıin tek 27 terek kesiletin boldy
ASTANA. KAZINFORM — Tarazda kóshedegi aǵashtardy kesý máselesi boıynsha ótken ashyq kezdesýden keıin kesiletin aǵashtardyń naqty sany anyqtaldy, dep habarlaıdy Kazinform tilshisi.
Talqylaýǵa Taraz qalasynyń ákimi Baqytjan Orynbekov, jaýapty mekemelerdiń ókilderi, sala mamandary jáne turǵyndar qatysty.
Kezdesý qorytyndysy boıynsha sanıtarlyq jaǵdaıy qanaǵattanarlyqsyz dep tanylǵan 27 terekti ǵana kesý týraly sheshim qabyldandy. Mundaı qorytyndyny Botanıka jáne fıtoıntrodýktsııa ınstıtýty júrgizgen zertteý negizinde shyǵarǵan. Mamandar aǵashtardyń aýrýǵa shaldyǵýyn, bıologııalyq jasyn, ómirsheńdigin jáne adamdarǵa qaýip tóndirý yqtımaldyǵyn baǵalaǵan.
Turǵyndar kósheniń jasyl jeleksiz qalmaýyn surady. Qala ákimdigi kesiletin terekterdiń ornyna bıiktigi 2,5 metrge deıin jetetin 100 kóshet otyrǵyzylatynyn málimdedi. Jobaǵa sáıkes, kóshe boıyna 50 jasyl shaǵan jáne 50 katalpa aǵashy egiledi.
Mamandardyń aıtýynsha, bul aǵash túrleri óńirdiń klımatyna beıimdelgen jáne qalany kógaldandyrýǵa qolaıly. Alaıda olardyń ósip, eresek terekterdiń ornyn basýy úshin ýaqyt qajet.
Kezdesý barysynda turǵyndar jańa kóshetterdi kútip-baptaý máselesine de alańdaýshylyq bildirdi. Olar sýarý qalaı uıymdastyrylatynyn, kóleńkeli aýmaqtardyń saqtalatynyn jáne abattandyrý jumystarynyń sapasyn kim baqylaıtynyn surady.
Baqytjan Orynbekov turǵyndardyń usynystary eskeriletinin aıtyp, sýarý júıesi buǵan deıingi jobalarda jiberilgen kemshilikterdi nazarǵa ala otyryp uıymdastyrylatynyn jetkizdi.
Ákimdik málimetinshe, qazir Tóle bı kóshesindegi abattandyrý jumystarynyń shamamen 30%-y aıaqtalǵan. Jobany tolyq qazan aıynda aıaqtaý josparlanyp otyr.
Buǵan deıin Taraz bıligi qala ortalyǵynda 90 terekti kesýdi josparlaǵany habarlanǵan bolatyn.
Sondaı-aq Jambyl oblysynda ormandy alqapqa 143 mıllıonnan astam aǵash otyrǵyzý josparlanǵan.
