Tarazda qatty kúıip qalǵan balanyń jaǵdaıy jaqsaryp keledi - dárigerler
TARAZ. QazAqparat - Janarmaı órtenip, denesin kúıik shalǵan alty jasar Maksım Legostaevty emdeý qalaı júrgizilip jatqany jóninde Jambyl oblysy ákimdigine qarasty densaýlyq saqtaý basqarmasy túsinikteme berdi, dep habarlaıdy QazAqparat.
«Naýqas alty jasar Maksım Legostaev 17 maýsymnan bastap qalalyq №2 aýrýhana kúıikti emdeý bólimshesinde «basy, moıny, arqasy jáne eki ıyǵy ekinshi jáne úshinshi dárejede termııalyq jalynnan kúıgen» degen dıagnozben statsıonarlyq emdeý júrgizilýde. Qazirgi ýaqytta balanyń jaǵdaıy birqalypty. Em-dom sharasynan keıin balanyń jaǵdaıy jaqsaryp keledi, kúıik shalǵan jer 12% azaıdy. Barlyq emdeý jáne dıagnostıkalyq is-sharalar dıagnostıka men emdeýdiń klınıkalyq hattamasyna sáıkes júrgizilýde», - delingen basqarmanyń baspasóz habarlamasynda.
Qalalyq №2 aýrýhana dárigerleri balany emdeý Tegin medıtsınalyq kómektiń kepildik berilgen kólemine - TMKK sáıkes júrgizilgenin málim etti.
Aıta keteıik, 17 maýsym kúni Taraz qalasyndaǵy №2 aýrýhananyń kúıik bólimine denesiniń kóp bóligin kúıik shalǵan 6 jasar bala tústi. Dárigerler oǵan «basy, moıny, arqasy men eki ıyǵynan, denesiniń 18% 2-3 dárejedegi kúıik shalǵan» degen dıagnoz qoıǵan.
Balanyń aıtýynsha, ol tez tutanatyn suıyqtyqpen oınap jatqan kezde jasy 7-ge tolǵan kórshi úıdiń balalary kelip, oǵan ot qoıǵan. Qazir saraptamalar taǵaıyndalyp, janarmaı quıylǵan ydys tárkilengen.
Atalǵan faktini Taraz qalalyq Іshki ister basqarmasy sotqa deıingi tergeýdiń biryńǵaı tizilimine engizip, QR QK 107-baby, 2-bóligi negizinde qylmystyq is qozǵady.
Avtor: Galına Skrıpnık
