Tarazda qatty aıazda eki adam úsip qalǵan
Sınoptıkterdiń pikirinshe, qys ýaqytynda osy kezeńde mundaı aıaz bolmaǵan.
Tarazda ortasha jyldyq temperatýra jeltoqsannyń basynda jáne ortasynda + 0 +8 gradýstan aspaıtyn.
Jambyl oblystyq densaýlyq saqtaý basqarmasynyń baspasóz qyzmetinen habarlaǵandaı, mundaı aıazǵa úırenbegen tarazdyqtardy úsik shalyp, dárigerge júginip jatyr.
«Osy demalysta oblys ortalyǵynyń eki turǵyny úsik shalý belgilerimen jedel járdem shaqyrǵan. 54 jastaǵy er adam uzaq ýaqyt dalada júrgen. Zardap shegýshiniń aıtýynsha, sodan keıin úıinde qyzýy kóterilip, saýsaqtaryn sezbeı qalǵan. Sosyn jedel járdem shaqyrǵan. Medıtsına qyzmetkerleri ony úsik shalǵanyn anyqtap, kómek kórsetken. 49 jastaǵy turǵyn da sýyqqa qaramastan uzaq ýaqyt kóshede turyp qalyp úsik shalǵan. Oǵan qajetti medıtsınalyq kómek kórsetildi», - dedi vedomstvodan.
Jambyldyq dárigerler qysqy aýa raıyna baılanysty aıazdy kúnderi abaı bolýǵa shaqyrady.
«Іshimdik ishpegen durys, múmkindiginshe temeki shekpeńizder. Sondaı-aq kofe kóp ishpegen jón, sebebi kofeın tamyrdy taryltyp, aıaq pen qoldaǵy qan aınalymyn baıaýlatady. Yńǵaıly, jyly kıim men aıaq kıim kıińiz. Eń jaqsy syrt kıim – jyly, jeńil, qozǵalysqa kedergi keltirmeıtin, sý ótkizbeıtin kıim. Qatty aıazda birneshe qabat kıim kıgen durys, sebebi kıim qabaty arasynda jylý saqtalady. Betińizdi jumsaq sharfpen orap alyp, sonymen tynys alyńyz», - dedi vedomstvo.
Dárigerler aıaq kıimge erekshe mán berýge keńes beredi.
«Aıaq kıim jyly, yńǵaıly, tabany qalyń bolýy kerek. Qatty aıazda bıik ókshe kımegen durys. Tabanyńyz tabıǵı emes qalypta tursa qan aınalymǵa kedergi keltiredi jáne úsik qaýpi artady. Kún sýyqta bizdiń aǵzamyzǵa qosymsha «energııa kózi» qajet. Dıetany keıinge qaldyryp, dene belsendiligin arttyrǵan jón. Terige sý negizindegi kremder jaqpańyz, sebebi muz krıstalldary paıda bolyp, jasýshany zaqymdaıdy. Osy qarapaıym erejeler úsik shalýdan qorǵaıdy», - dep atap ótti Jambyl oblystyq densaýlyq saqtaý basqarmasynyń baspasóz qyzmetinen.