Tarazda kásipkerler tarıhı qoryq-mýzeıdiń bir bóligin zańsyz ıemdenip, saýda jasaǵan
TARAZ. KAZINFORM – «Ejelgi Taraz eskertkishteri» tarıhı-mádenı qoryq-mýzeıi Jambyl oblysynyń bes turǵynynyń ústinen jerdi paıdalanýdaǵy kedergilerdi joıý týraly sotqa talap qoıýmen júgingen. Bul týraly QR Joǵarǵy soty málim etti.
Mýzeı-qoryqtyń ıeliginde «Aısha-Bıbi» kesenesi bar, oǵan 2 gektar jer ýchaskesi turaqty jer paıdalaný quqyǵy berilgen.
Bul ýchastok ákimniń sheshimi jáne jer paıdalaný quqyǵy týraly aktisi boıynsha saýyqtyrý, rekreatsııalyq jáne tarıhı-mádenı maqsattarǵa arnalǵan erekshe qorǵalatyn tabıǵı aýmaqtarǵa jatady.
— Bul jerde birneshe tehnıkalyq bólmeler salynǵan. Alaıda bes kásipker bul ǵımarattardy zańsyz ıemdenip, qazir olarda kommertsııalyq qyzmetpen aınalysyp otyr. Mýzeı-qoryq sotqa júginip, kásipkerlerdi ózderi turyp jatqan ǵımarattardy bosatýdy talap etken, óıtkeni jaýapkerlerde saýda jasaýǵa ruqsattary, sondaı-aq bul úı-jaılardy kásipkerlik úshin paıdalaný quqyǵy men qujattary joq, — delingen sot habarlamasynda.
Sondaı-aq talap qoıýshy «Ejelgi Taraz eskertkishteri» tarıhı-mádenı qoryq-mýzeıiniń aýmaǵynda saýda jasaýǵa tyıym salynǵanyn atap ótken.
Tórt jaýapker talap qoıýdy moıyndamaǵan, kásipkerlerdiń biri daýly ǵımarattardy 2010 jyly óz qarajatyna salyp, keıin olarǵa saýda jasaý úshin tegin bergenin málimdegen. Besinshi jaýapker talap qoıýdy moıyndaǵan.
Jambyl aýdandyq soty kásipkerler qoryq-mýzeıge tıesili ǵımarattardy zańsyz ıemdengen degen qorytyndyǵa keldi.
Talap qoıý qanaǵattandyryldy: sot kásipkerlerge zańsyz ıelengen úı-jaıdy bosatýdy mindettedi.
Jaýapkerler bul sheshimge apellıatsııalyq tártippen shaǵym túsirgen. Alaıda, Jambyl oblystyq soty birinshi satydaǵy sottyń tujyrymymen kelisip, sheshimdi ózgerissiz qaldyryp otyr.
Qaýly zańdy kúshine endi.
Buǵan deıin habarlanǵandaı, Jambyl oblysynda balalardyń astan jappaı ýlaný sebebi aıtyldy.