Tarazda karantın talaptaryn buzǵandarǵa 200-ge jýyq hattama toltyrylǵan

TARAZ. QazAqparat – Tarazda jyl basynan beri karantın talaptaryn saqtamaǵandarǵa monıtorıng tobynyń músheleri 200-ge jýyq hattama toltyrǵan, - dep habarlaıdy QazAqparat tilshisi.

Atap aıtsaq, aǵymdaǵy jyldyń qańtar aıynda 34 hattama, aqpan aıynda 47 hattama, naýryz aıynda 54 hattama, sáýir aıynyń osy on kúndigi ózinde 50-ge jýyq hattama toltyrylǵan. Bul týraly búgin óńirlik kommýnıkatsııalar qyzmeti alańynda Taraz qalasy ákiminiń orynbasary Almas Sadýbaev aıtty.

Sondaı-aq, Taraz qalasynyń Bas sanıtarııalyq dárigeri Rıta Altynbasova da tikeleı efırge qatysyp, suraqtarǵa jaýap berdi.

Almas Sadýbaev aýrýdyń artýyna adamdardyń toı-tomalaqtan tıylmaı turýy sebep deıdi. Búginde Taraz qalasynda 74 meıramhana men 220 kafe bar. Olardyń basym bóligi jumys jasap tur desek te bolady. Turǵyndardyń qoǵamdyq oryndarda sanıtarlyq talaptardy saqtamaýy qoǵamǵa qaýipti áreket bolyp tur.

Al Rıta Altynbasavonyń sózinshe, Tarazda epıdemıologııalyq jaǵdaı nasharlaǵan. Qala qaýiptilik deńgeıiniń «jasyl» aımaǵynan «sary» aımaǵyna ótti. Aýrýshańdyqtyń turaqtaný, tómendeý úrdisi baıqalmaıdy. Ótken táýlikte koronavırýstyq ınfektsııa pnevmonııanyń 1446 jaǵdaı tirkeldi. Onyń ishinde KVI 882 adam bolsa, pnevmonııa 564. Koronavırýstyq ınfektsııasyn juqtyrǵandardyn ishinde zeınetkerler kósh basynda keledi. Búginde qalada 440 qart kisi juqpany juqtyrǵan. Jumyssyzdar qatarynda 370 adam bolsa, medıtsınalyq qyzmetker sany 50-di quraıdy.