Tarazda karantın talabyn buzǵan birneshe bar anyqtaldy

TARAZ. QazAqparat – Tarazda mobıldik toptar merekelik jáne eske alý is-sharalaryn ótkizýde shekteýlerdi saqtaý boıynsha bas sanıtarlyq dárigerdiń qaýlysynyń oryndalýyn baqylaýdy jalǵastyrýda, - dep habarlaıdy QazAqparat tilshisi.

Adamdar kóp jınalatyn oryndar men qaladaǵy oıyn-saýyq oryndary karantın shekteýlerine qatysty erekshe baqylaýda, olar betperde rejımi jáne áleýmettik qashyqtyń saqtalýy turǵysynan únemi tekserilip otyrady.

Kezekti reıd barysynda Taraz qalasy Polıtsııa basqarmasynyń qyzmetkerleri qalanyń birneshe mekemesinde, atap aıtqanda «Viber», «H.O», «Game over» barlarynda karantın rejımin buzý derekterin anyqtady.

«Osy barlarǵa qatysty Qazaqstan Respýblıkasy Ákimshilik quqyq buzýshylyqtar týraly kodeksiniń 425-baby «Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» boıynsha materıaldar jınaqtalyp, buzýshylardy ákimshilik jaýapkershilikke tartý úshin sanıtarlyq- epıdemıologııalyq qyzmetke joldandy», - delingen oblystyq polıtsııa departamenti baspasóz qyzmeti habarlamasynda.