Tarazda Qarahan memleketiniń aqsha aınalymyn aıǵaqtaıtyn jádigerler kórsetildi
ASTANA.KAZINFORM — Halyqaralyq arheologtar kúnine oraı «Ejelgi Taraz eskertkishteri» memlekettik tarıhı-mádenı mýzeı-qoryǵynda «Taraz arheologııasy: Qarahan memleketinen qalǵan nýmızmatıkalyq jádigerler» atty kórme ashyldy. Bul týraly Mádenıet jáne aqparat mınıstrligi málim etti.
— Kórmege Taraz qalasyndaǵy arheologııalyq eskertkishterdi zertteý barysynda tabylǵan, Qarahan memleketi kezeńine jatatyn 104 nýmızmatıkalyq jádiger qoıyldy. Olardyń qatarynda tıyndar men basqa da arheologııalyq oljalar bar, — delingen habarlamada.
Usynylǵan jádigerler ortaǵasyrlyq kezeńdegi aqsha aınalymy men saýda-ekonomıkalyq baılanystardy zerdeleýge múmkindik beredi. Sondaı-aq Tarazdyń Uly Jibek joly boıyndaǵy mańyzdy ortalyqtardyń biri bolǵanyn aıǵaqtaıdy.
Mýzeı-qoryq mamandary kelýshilerdi jádigerlerdiń tarıhymen, olardy zertteý erekshelikterimen jáne óńirdiń arheologııalyq murasymen tanystyrdy.
Aıta keteıik, buǵan deıin Túrkistan oblysynda Qańly dáýiriniń qundy jádigerleri tabylǵan bolatyn.
