Tarazda qalyń qar saldaryn joıý jumystary tórtinshi táýlikke sozyldy
ASTANA. QazAqparat - Taraz qalasynyń kommýnaldyq sharýashylyq qyzmeti 45 santımetr qalyńdyqta túsken «alǵashqy qarmen» kúresýde, dep habarlady «QazAqparat» tilshisi.
Turǵyndardyń pikirinshe, 14 qazanǵa qaraǵan túni jaýǵan qardyń qalyńdyǵyndaı qar Jambyl oblysynda buryn-sońdy bolmaǵan. Áli jerge túse qoımaǵan jasyl japyraqty kómkere jaýǵan jylbysqy qar butaqtardy syndyryp qana qoımaı, elektr jelilerin de isten shyǵardy. Telefon kabelderi zardap shegip, telefon, ınternet baılanystarynyń úzilýine alyp keldi. Kóptegen kólikter qulaǵan butaqtar astynda qaldy.
«QazAqparat» tilshisine Taraz ákimi Nurjan Kalenderev habarlaǵandaı, Taraz boıynsha elektr symdary úzilgen shaǵymmen barlyǵy 1 639 shaqyrtý tirkelgen.
«Qazir 1 323-i qalpyna keltirildi. 22 brıgada jumys istep, elektr júıesin retke keltirýde. Oblys ákiminiń ókimi boıynsha qalany jınaýǵa qyzmet mamandarymen qosa, qalalyq uıymdar men mekemelerdiń qyzmetkerleri de shyqqan. Barlyǵy bes myń adam jumyldyryldy», - dedi ol.
TJD baspasóz qyzmetininiń derekterine sáıkes, TJD «Jedel qutqarý jasaǵy» MM jedel qutqarý jumystaryna shamamen 20 ret shyqqan. Qulaǵan butaqtar astynan 7 jeńil kólik syrtqa shyǵaryldy. Budan basqa, kóshelerdi qulaǵan aǵashtar men butaqtardan tazalaý, adam ómiri men densaýlyǵyna qaýip ákeletin aǵash butaqtaryn qııý jumystary júrgizildi. 
