Tarazda qalalyq sotty jarmaqshy bolǵan azamat ustaldy
TARAZ. QazAqparat – Taraz qalalyq sot ǵımaratyn granatamen jaramyn dep qorqytqan kúdikti qolǵa tústi, dep habarlaıdy QazAqparat tilshisi.
Jurtty qatty úreılendirgen turǵynnan eshqandaı jarylǵysh zat tabylmaǵan. Bul týraly Jambyl oblystyq Polıtsııa departamentiniń baspasóz qyzmeti málám etti.
«2020 jyldyń 5 qarashasy kúni saǵat 09.10-da oblystyq Polıtsııa departamentiniń kezekshi bólimine №2 Taraz qalalyq sotynyń kireberisinde belgisiz azamat granaty jarylǵysh zatyn jarmaqshy bolyp jatqany týraly habarlama kelip tústi. Oqıǵa ornyna jedel jetken tártip saqshylary 49 jastaǵy qala turǵynyn ustady. Tekseris barysynda odan eshqandaı jarylǵysh zat tabylǵan joq. Odan bólek kúdiktiniń aqyl-esi kem retinde psıhıkalyq dıspanserde tirkeýde turǵany belgili boldy»,-delingen vedomstvo habarlamasynda.
Atalǵan fakt boıynsha QR Qylmystyq kodeksiniń «Terrorızm aktisi týraly kórineý jalǵan habarlaý» 273-baby boıynsha sotqa deıingi tergeý bastaldy. Kúdikti Jambyl oblystyq psıhonevrologııalyq dıspanserine ornalastyryldy.
