Tarazda ınvestorlarǵa zańsyz tosqaýyl qoıǵan sheneýnikter jaýapqa tartyldy
ASTANA. KAZINFORM — Tarazda quny 17 mlrd teńgeni quraıtyn jobalar boıynsha ınvestorlardyń quqyqtary qorǵaldy, dep habarlaıdy Jambyl oblysy prokýratýrasynyń baspasóz qyzmeti.
Taraz qalasynyń prokýratýrasy Investorlardyń quqyqtaryn qorǵaý komıtetimen birlesip, ınvestıtsııalyq jobalardy iske asyrý barysynda ınvestorlardyń quqyqtarynyń buzylý faktilerin anyqtady. Atap aıtqanda jergilikti atqarýshy organ quny 3 mlrd teńgeni quraıtyn traktorlar men kombaındar shyǵaratyn zaýyt qurylysy jobasyn júzege asyryp jatqan «Kaz FMWORLD Agricultural Machinery» JShS-ne sáýlet-josparlaý tapsyrmasyn berýden negizsiz bas tartqan.
Sonymen qatar quny 14 mlrd teńgeni quraıtyn qant zaýytyn salý jónindegi «TSZ» JShS-niń ınvestıtsııalyq jobasyn súıemeldeý barysynda elektr jelilerine qosylýǵa berilgen tehnıkalyq sharttarǵa ınvestorǵa qosymsha qarjylyq shyǵyndar júkteıtin negizsiz talaptar engizilgen.
— Prokýrorlyq qadaǵalaý sharalarynyń nátıjesinde zańbuzýshylyqtar joıylyp, ınvestorlardyń buzylǵan quqyqtary qalpyna keltirildi, al kináli laýazymdy tulǵalar zańnamada belgilengen tártippen jaýaptylyqqa tartyldy, — delingen habarlamada.
Jyl basynan beri Tarazda ınvestıtsııalyq jobalardy júzege asyryp jatqan 9 ınvestordyń quqyqtary qorǵaldy. Ákimshilik kedergilerdi joıý jáne óńirdiń ınvestıtsııalyq ahýalyn jaqsartý baǵytyndaǵy jumystar jalǵasady. Jambyl oblysynyń prokýratýrasy ákimshilik kedergilerge tap bolǵan ınvestorlardy 8 (775) 891-25-52 baılanys telefony arqyly nemese 115 Call-ortalyǵyna habarlasýǵa shaqyrady.
Buǵan deıin Mańǵystaýda prokýratýra iri ınvestordyń quqyǵyn qorǵaǵanyn jazǵanbyz.
