Tarazda halyqaralyq týrıstik forým ótedi
TARAZ. QazAqparat - Aǵymdaǵy jyldyń 13-15 jeltoqsan kúnderi Taraz qalasyndaǵy Qazaqstan halqy assambleıasynyń «Dostyq úıi» ǵımaratynda «Ancient Taraz-2018» halyqaralyq týrıstik forýmy ótedi, dep habarlaıdy QazAqparat.
Aýqymdy shara aıasynda qolónershilerdiń «Kóne Taraz sheberleri» halyqaralyq kórmesin de uıymdastyrý josparlanǵan. Bul týraly oblystyq týrızm basqarmasynan habarlandy.
Forýmda týrıstik salaǵa ınvestıtsııa tartý, týrızm qaýipsizdigi jáne salany sandyq júıege aýystyrý máseleleri talqylanady. Al kórmede Qazaqstan, jaqyn jáne alys shetelderdiń qolóner sheberleriniń jumystary usynylady, sondaı-aq birqatar praktıkalyq jáne teorııalyq sheberlik sabaqtary men ǵylymı - praktıkalyq konferentsııa ótkiziledi dep kútilýde.
Sharaǵa Qazaqstan, Reseı, Qytaı, Qyrǵyzstan, Ózbekstan, Italııa jáne taǵy basqa elderdiń delegattary qatyspaq.
Ǵıbrat Sembaı
