Tarazda halyqaralyq «Aspara fashion week» sán aptalyǵy ótýde
TARAZ. QazAqparat – Tarazda «Aspara fashion week» sán aptalyǵy bastaldy. Halyqaralyq deńgeıdegi kórsetilimge kórshiles Qyrǵyz, Tájik memleketiniń dızaınerlerimen qatar álemdik brendterimen tanymal Italııa, Reseı jáne Bolgarııa elderinen arnaıy meımandar shaqyrtylǵan, dep habarlaıdy QazAqparat tilshisi.
Osymen 4-shi jyl qatarynan ótip jatqan aptalyq otandyq dızaınerlerge halyqaralyq arenada óz ónimderin jarnamalaýǵa múmkindik bermek.
Aptalyqta Eýropa men Azııa elderinen 20-ǵa jýyq dızaınerdiń týyndylary usynylatyn bolady. Kórsetilimge jeńil ónerkásiptiń damýyna qyzyǵýshylyq tanytatyn mamandar, onyń ishinde alys-jaqyn shet elden arnaıy qonaqtar kelgen. Olar mundaı mádenı kesh sheberdiń shyǵarmashylyǵyn shyńdap, ár dızaınerdi jańa ıdeıalarǵa shabyttandyrady deıdi.
«Men Qazaqstanǵa jıi kelemin. Óıtkeni mundaǵy dızaınerlermen tyǵyz qarym-qatynastamyn. Ózara tájirıbe almasyp otyramyz. Qazaqtyń ulttyq kıimderine qyzyǵýshylyǵymyz bar. Onda ulttyq naqyshtaǵy oıýlar erekshe áser berip turady», - deıdi Italııadan arnaıy kelgen, «Mılano» sán úıiniń dırektory Marıanna Mıchelı.
Shara barysynda qazaqstandyq dızaınerler neofolklor stılindegi toptamalardy tanystyrdy. Qonaqqa, balalarǵa, kúndelikti dep bólingen kıimderdiń kópshiligi qazaqı naqyshta jasalǵan. Sebebi, talǵamy bıik tutynýshylardyń qyzyǵýshylyǵy qazir osy baǵytqa aýǵan. Qolónershiler, tipten dástúrli brendterimiz shet elge satylymǵa jiberiletinin aıtady.
«Mundaǵy kóılekter ózimizdiń dızaınerlerdiń qolynan shyqqan dúnıeler. Qazir elimizde sán salasynda júrgenderdiń basym bóligi ulttyq naqyshtaǵy kıimderdi tigedi. Óıtkeni, qoǵamnyń ózinde oıýly-órnekti, kesteli kıimder suranysqa ıe», - dedi «Asyl-Dızaın» sán úıiniń bas dızaıneri Aıdarhan Qalıev.
Sán aptalyǵy aıasynda qonaqtar kóne shahardyń keremet jerlerine saıahattaıdy. Uıymdastyrýshylar tarapynan týrızimdi damytý maqsatynda munan ózge de kóptegen mádenı is-sharalar ótkizý josparlanǵan.
