Tarazda Halyq Qaharmany Ǵazız Baıtasovtyń týǵan kúnin atap ótti
ASTANA. QazAqparat - 2011 jyly qarashada ómirin qıyp, lańkesti toqtatqan batyr polıtseı Ǵazız Baıtasovtyń eskertkishine Taraz turǵyndary gúl shoqtaryn qoıdy, dep habarlady oblystyń ІІD baspasóz qyzmeti.
Bir mınýt únsizdik pen aspanǵa oq atyp, kelýshiler qyzmettik boryshyn oryndaý kezinde qaza tapqan ІІO qyzmetkerlerin eske aldy.
«Olar máńgilik jadymyzda saqtalady», dedi ІІD bastyǵy polıtsııa general maıory Tilegen Mátkenov.
«Olardyń ishinde lańkesti ustaý kezinde erlikpen qaza tapqan jol polıtsııasy jeke batalony 1-vzvodynyń komandıri polıtsııa kaptany Ǵazız Baıtasov degen erekshe jan bar. Ol Qazaqstanda «Halyq Qaharmany» joǵary ataǵyna laıyqty bolǵan alǵashqy polıtseı».
Halyq batyrynyń jubaıy Gúljamal Tájıeva jınalǵan qaýymǵa týystary atynan sóz sóıledi. Ol jaqyn adamynyń ómirden erte ozǵany jaıly qaıǵysymen bólisip, qalalyqtardy, basshylyqty, jeke quramdy qaza tapqandardyń otbasyna qamqorlyq kórsetip, kóńil bólgenderi úshin alǵys bildirdi. Ǵazızdiń áriptesteriniń qyzmetine tynyshtyq pen olarǵa densaýlyq tiledi.
Eske salsaq, Tarazda 2011 jyly 12 qarashada lańkesterdiń qylmysy saldarynan 7 adam qaza tapqan, onyń 5-eýi polıtsııa qyzmetkeri, 2-eýi azamattyq tulǵalar. Budan basqa ishki ister organdarynyń úsh qyzmetkeri jaraqat alǵan.
