Tarazda Halyq Qaharmany Ǵazız Baıtasovqa arnalǵan eskertkishtiń irgetasy qalandy
TARAZ. QazAqparat – Aǵymdaǵy jyldyń 3 sáýirinde aty ańyzǵa aınalǵan polıtsııa kapıtany Ǵazız Baıtasov 50 jasqa tolar edi. Erjúrek polıtseıdiń esimin qazaqstandyqtar, ásirese jambyldyqtar eshqashan umytpaıdy, - dep habarlaıdy QazAqparat tilshisi.
Búginde ózi oqyǵan mektep, oblys ortalyǵyndaǵy kóshe batyrdyń atymen atalady. Polıtsııa departamentiniń aldyna Ǵazız Baıtasovtyń bıýsti ornatylǵan. Jyl saıyn polıtsııa kapıtanynyń týǵan kúninde jáne óz basyn qurban ete otyryp, qaýipti terrorıstti toqtatqan kúninde quqyq qorǵaý organdarynyń qyzmetkerleri túrli eske alý sharalaryn ótkizip keledi.
Aldaǵy sáýir aıynyń basynda oblys ortalyǵyndaǵy «Jeńis» saıabaǵynda polıtsııa departamentiniń bastamasymen jáne oblys ákimdiginiń qoldaýymen Halyq Haharmanyna eskertkish ornatylmaq. Búgin bılik jáne quqyq qorǵaý organdary ókilderiniń, depýtattar men batyrdyń týystarynyń qatysýymen eskertkishtiń irgetasy qalandy.
«Ǵazız Baıtasov «Halyq Qaharmany» joǵary ataǵyn alǵan birinshi jáne jalǵyz polıtseı bolyp tabylady. Bizdiń bastamamyzǵa qoldaý bildirgeni úshin oblys jáne Taraz qalasynyń basshylyǵyna shyn júrekten rızashylyǵymdy jetkizgim keledi», - dedi polıtsııa departamentiniń bastyǵy Janat Súleımenov.
«Men ózimniń jáne balalarymnyń atynan Ǵazızdi eske alýshylardyń barlyǵyna, eń aldymen onyń áriptesteri men jergilikti bılikke alǵys aıtqym keledi. Bizdi árqashan umytpaı, elep, eskerip, kóptegen is-sharalarǵa qurmetti qonaq retinde shaqyryp otyrady. Al «Jeńis» saıabaǵynan eskertkishtiń ashylýy onyń janqııarlyq erliginiń laıyqty baǵasynyń jáne kórsetilgen qurmettiń taǵy bir kórinisi dep bilemin», - deıdi batyrdyń jesiri Gúljamal Tájıeva.
Batyrdyń mereıtoıyna oraı ashylatyn eskertkish halqymyzdyń jáne onyń batyr perzentteriniń erligi men órliginiń naǵyz sımvolyna aınalmaq. Óıtkeni, Ǵazız Baıtasovtyń ónegeli ǵumyry – elimizdiń óskeleń jas urpaǵy úshin jarqyn úlgi. Atalǵan eskertkishtiń ashylýy aǵymdaǵy jyly Táýelsizdigimizdiń 30 jyldyq mereıtoıyn atap ótetin azat eldiń tarıhyna altyn áriptermen jazylary sózsiz.
