Tarazda halyqaralyq sán festıvalinde ulttyq naqyshtaǵy kıim úlgileri tanystyryldy
ASTANA. KAZINFORM – Taraz qalasyndaǵy «Kóne Taraz» etno-mádenı kesheninde «Mura kody» taqyrybymen ASPARA FASHION DAY 2026 halyqaralyq sán festıvali ótti, dep habarlady Jambyl oblysynyń ákimdigi.
21 qarashada ótken mádenı is-sharanyń maqsaty – qazaq halqynyń ulttyq murasyn zamanaýı sán ındýstrııasymen ushtastyrý, otandyq dızaınerlerdi qoldaý, qolóner dástúrlerin dáripteý jáne óńirdiń mádenı-týrıstik áleýetin halyqaralyq deńgeıde tanytý.
ASPARA FASHION DAY – dızaıner, «ASPARA» sán úıiniń negizin qalaýshy Aıdarhan Qalıevtiń bastamasymen damyp kele jatqan halyqaralyq joba. Jyl saıyn uıymdastyrylatyn festıval otandyq jáne sheteldik dızaınerler arasyndaǵy shyǵarmashylyq baılanysty nyǵaıtýǵa baǵyttalǵan.
Bıyl festıval aıasynda qolónershiler kórmesi, kontserttik baǵdarlama, halyqaralyq forým jáne sán kórsetilimi uıymdastyryldy.
«Kóne Taraz» keshenindegi kórmege 33 sheber qatysyp, ulttyq qolóner buıymdaryn, dástúrli áshekeılerdi, kádesyılar men avtorlyq týyndylaryn kópshilik nazaryna usyndy. Sonymen qatar ónerpazdar ulttyq jáne zamanaýı mýzykalyq shyǵarmalardy oryndady.
Іs-sharanyń mańyzdy bólikteriniń biri Jambyl oblystyq tarıhı-ólketaný mýzeıinde ótken halyqaralyq forým boldy. Oǵan memlekettik organdardyń ókilderi, sán ındýstrııasynyń mamandary, dızaınerler, shyǵarmashylyq qaýymdastyq ókilderi men stýdentter qatysty.
Forýmda ulttyq mádenı murany saqtaý, sán ındýstrııasyn damytý, kreatıvti ekonomıka men týrızmniń baılanysyn nyǵaıtý máseleleri talqylandy.
– Festıvaldiń basty maqsaty – qazaq halqynyń ulttyq mádenı murasyn zamanaýı sán ındýstrııasymen ushtastyrý, otandyq dızaınerlerdiń shyǵarmashylyǵyn qoldaý, qolóner dástúrlerin dáripteý jáne Jambyl oblysynyń mádenı-týrıstik áleýetin halyqaralyq deńgeıde tanytý. Festıval aıasynda qolónershiler kórmesi, kontserttik baǵdarlama, halyqaralyq forým jáne sán kórsetilimi uıymdastyryldy, – delingen uıymdastyrýshylar usynǵan aqparatta.
Jambyl oblysy ákiminiń orynbasary Serik Sálemov óńirdegi mádenıet, shyǵarmashylyq ındýstrııa jáne týrızm salalaryn damytý baǵytyndaǵy jumystarǵa toqtaldy.
Oblys ákimdiginiń týrızm salasyna jaýapty basqarma basshysy Dastan Aıdarhanov festıvaldiń óńirdiń týrıstik tartymdylyǵyn arttyrýdaǵy mańyzyn atap ótti. Al «Kazakh Tourism» ulttyq kompanııasynyń ókili Aqbota Qaıyrhanova halyqaralyq is-sharalardyń Qazaqstannyń týrıstik áleýetin ilgeriletýdegi róli týraly aıtty.
Festıvaldiń negizin qalaýshy Aıdarhan Qalıev ulttyq sán ónerin halyqaralyq deńgeıde tanytý, jas dızaınerlerdi qoldaý jáne shyǵarmashylyq yntymaqtastyqty keńeıtý máselelerine nazar aýdardy.
Keshtiń basty oqıǵasy «Mura kody» halyqaralyq sán kórsetilimi boldy. Onda ulttyq mádenı elementter men zamanaýı dızaınerlik sheshimder úılesken avtorlyq toptamalar usynyldy.
Uıymdastyrýshylardyń aıtýynsha, festıval Tarazdyń Uly Jibek joly boıyndaǵy tarıhı-mádenı ortalyq retindegi ereksheligin tanytyp, sán, qolóner jáne týrızm salalary arasyndaǵy baılanysty nyǵaıtýǵa baǵyttalǵan.
2021 jyly Taraz Dúnıejúzilik qolónershiler keńesiniń sheshimimen «Dúnıejúzilik qolónershiler qalasy» mártebesin alǵan.
Aıta keteıik, buǵan deıin Tarazda ótken «Taraz – qolónershiler qalasy» halyqaralyq festıvali aıasynda ASPARA FASHION WEEK sán aptalyǵynyń XVII maýsymy uıymdastyrylyp, ulttyq naqyshtaǵy kıim úlgileri kórsetilgen edi.