Tarazda gúldegen jemis aǵashtaryn úsik shalýy múmkin
TARAZ. QazAqparat - Óńirde kún sýytqanyna qaramastan Tarazda jemis aǵashtary gúldep tur, dep habarlaıdy «QazAqparat» HAA tilshisi.
Jyly aýa raıyna úırenip qalǵan tarazdyqtardy ótken qys birshama ábirjitti. Munyń ústine kóktem de qubylmaly bolyp tur. Ótken aptada oblys ortalyǵynda kún kúrt ysydy. Naýryz merekesinde termometr baǵany, tipti +28 gradýsqa deıin kóterildi. Biraq bul aıdyń sońynda soltústik-shyǵystan sýyq jel soqty, onyń arty muzdaı jańbyrǵa ulasyp, temperatýra 0 +4 gradýsqa deıin tómendedi.
Degenmen oblys ortalyǵyndaǵy jemis aǵashtarynyń barlyǵy gúldedi, qyzǵaldaqtar boı túzedi. Túnergen aspan astyndaǵy osynaý kórinister kóńilge qýanysh uıalatady.
Taý shatqaldarynda qyzǵaldaqtar ashyla bastady, Tarazǵa jaqyn alma baǵynda da osyndaı kórinister. Degenmen baǵbandarda gúldegen jemis aǵashtaryn úsik shalýy múmkin degen qaýip te joq emes.Ondaı jaǵdaıda mol ónim alýdyń aýyly qashyqtamaq.
Qazgıdromettiń jambyldyq meteorologtarynyń boljamyna qaraǵanda, sáýirde ortasha aýa temperatýrasy + 11 +14 gradýs mańaıynda bolmaq, bul normadan eki gradýsqa joǵary.
Biraq alǵashqy onkúndikte túnde 0-den + 5-ke, kúndiz +5 -ten +10 gadýsqa deıin ǵana jyly bolady.
