Tarazda grek-rım kúresinen ótip jatqan týrnırge tórt elden 350-ge jýyq balýan jınaldy

TARAZ. QazAqparat – El Táýelsizdiginiń 30 jyldyǵyna oraı Tarazda grek-rım kúresinen Olımpıada jáne álem chempıony, Qazaqstannyń Eńbek Eri Jaqsylyq Úshkempirovti eske alýǵa arnalǵan jasóspirimder arasyndaǵy ashyq respýblıkalyq týrnır bastaldy, dep habarlaıdy QazAqparat tilshisi.

Baıraqty básekede el sportshylarymen birge Qyrǵyz Respýblıkasy, Ózbekstan, Tájikstannan kelgen 350-ge jýyq sportshy kúsh synaspaq.

Týrnırdiń ashylý saltanatyna qatysqan oblys ákimi Berdibek Saparbaev sportshylarǵa sáttilik tiledi.

«Biz búgin Máskeý Olımpıadasynyń jáne álem chempıony Jaqsylyq Úshkempirov atyndaǵy «Taraz-Arena» sport saraıynda Jaqsylyq Úshkempirovke arnalǵan respýblıkalyq ashyq týrnırge jınalyp otyrmyz. Elimizdi álemge tanytqan Jaqsylyqtaı tulǵalardan jasóspirimder úlgi alýy tıis.

Búgingi is-sharaǵa da Olımpıada, álem chempıondarynyń qurmetti qonaq bolyp kelýi beker emes. Sebebi, Olımpıada chempıondary Ermahan Ybyraıymov, ıÝrıı Mılıchenko, Olımpıada júldegerleri Bolat Jumádilov, Eldos Smetov, Aqjúrek Tańatarovtardyń osy jarystan boı kórsetýi – jasóspirimderge úlken kúsh-jiger beredi. Jarysqa qatysýshylardyń barlyǵyna sáttilik tileımin, alys-jaqyn shetelderden kelgen jas sportshylarǵa rızashylyǵymdy bildiremin», - dedi aımaq basshysy.

Munan soń Olımpıada chempıondary Ermahan Ybyraıymov, ıÝrıı Mılıchenko sóz alyp, sportta jeńiske jetý – úlken eńbek pen sáttilikti talap etetinin basa aıtyp, Jaqsylyq Úshkempirovtyń dańqty jolynan syr shertti.

Máskeý Olımpıadasynyń chempıonynyń týǵan ápkesi Shyrynkúl Úshkempirova tebirene sóz sóılep, baýyryna kórsetilip jatqan barlyq qurmeti úshin alǵys aıtty.

Munan soń boz kilemde kúres bastalyp ketti. Jarystyń alǵashqy jekpe jekterinde jambyldyq balýandar 51 keli salmaqtaǵy Aıan Mahmetáli, 71 keli salmaqta Beıbarys Shymyrbek jeńiske jetip jerlesterin qýandyrsa, qyrǵyz balýany Sábıt Shámshıdı de aqtóbelik Nurlan Aqylbekten aılasyn asyrdy.

Týrnır 14 qazanǵa deıin jalǵasatyn bolady.