Tarazda Fırýza Sharipovany TarMPI ujymy saltanatpen qarsy aldy
TARAZ. QazAqparat - Búgin Taraz jurtshylyǵy jáne Taraz memlekettik pedagogıkalyq ınstıtýtynyń ujymy Áýlıeata áýejaıynan qazaqstandyq kásipqoı boksshy qyz, álem chempıony Fırýza Sharipovany zor qoshemetpen qarsy aldy, dep habarlaıdy joǵary oqý orynnyń baspasóz qyzmeti.
Jıynda sóz alǵan TarMPI rektory, QR UǴA-nyń akademıgi, tarıh ǵylymdarynyń doktory, professor Darııa Qojamjarova: «Fırýza qyzdyń 50 jyldyq tarıhy bar Taraz memlekettik pedagogıkalyq ınstıtýtynyń túlegi ekenin zor maqtanyshpen atap ótkim kelip otyr. Fırýza 2013-2017 jyldary Óner jáne mádenıet fakýltetiniń, Dene shynyqtyrý jáne sport mamandyǵynda bilim aldy. Stýdent kezinde talaı jetistikterine kýá boldyq. Búgin mine, álem nazaryn ózine aýdarǵan Astanada ótken kásipqoı bokstan áıelder arasyndaǵy álem chempıonatynda bolgar qyzy Mılena Kolevany oısyrata jeńip, WIBA jáne WBU nusqalary boıynsha chempıondyq ataqqa qol jetkizip otyr. Bul biz úshin úlken maqtanysh» dep atap ótti.
Óz kezeginde sóz alǵan Fırýza Sharıpova, búgingi jeńisin ózi bilim alǵan Taraz memlekettik pedagogıkalyq ınstıtýtynyń 50 jyldyq mereıtoıyna arnaıtyndyǵyn jetkizdi.
Esterińizge sala keteıik, búgin Fırýza Sharipovaǵa kásipqoı bokstan álem chempıony atanǵan Qazaqstandaǵy birinshi burymdy sportshy retinde Qazaqstan rekordtar kitabyna engeni týraly sertıfıkat tapsyryldy .
