Tarazda esirtkini jarnamalaıtyn 100-den astam grafıttı jazý joıyldy

TARAZ. QazAqparat – Jambyldyq polıtseıler men eriktiler «Biz esirtkige qarsymyz!» birlesken aktsııasyn ótkizdi, dep habarlaıdy QazAqparat tilshisi.

Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń qyzmetkerleri Taraz qalasynyń «Tabysty adamdardy tańdaý» qoǵamdyq birlestiginiń eriktilerimen birlesip, «Biz esirtkige qarsymyz!» taqyrybynda is-shara ótkizdi. Shara barysynda oblys ortalyǵyndaǵy úıler men ǵımarattardyń qabyrǵalaryndaǵy graffıtı jazýlar joıyldy. Mundaı graffıtı jazýlardyń mazmunynda esirtki satyp alý úshin kodtyq sózder men baılanys nómirleri kórsetiledi.

Aktsııa nátıjesinde qala boıynsha 100-den astam osyndaı jazýlar joıyldy. Sondaı-aq, Esirtki qylmysyna qarsy is-qımyl basqarmasynyń qyzmetkerleri ınternet jelisiniń kúndelikti monıtorıngi arqyly Telegram qosymshasynda jumys istep, esirtkini nasıhattaǵan ınternet-saıttardy anyqtady. Qazirgi ýaqytta atalǵan ınternet-saıttar buǵattalyp, oǵan qatysy bar adamdardy anyqtaý jáne ustaý boıynsha izdestirý is-sharalary júrgizilýde.

«Jambyl oblysynyń turǵyndary úshin mańyzdy aqparat. Graffıtı-jazýlar jazǵany jáne kompıýterlik jelilerde kórsetilgen málimetterdi taratqany úshin 2020 jylǵy 11 qańtarda zańdy kúshine engen QR QK 299-1-baby boıynsha jaza kózdelgen, ıaǵnı, 1-bólim boıynsha úsh jylǵa deıin bas bostandyǵynan aıyrý; 2-bólim boıynsha – úsh jyldan alty jylǵa deıingi merzimge bas bostandyǵynan aıyrý jazasy qarastyrylady», - delingen oblystyq polıtsııa departamentiniń baspasóz qyzmetiniń habarlamasynda.

Sondaı-aq, Polıtsııa departamenti oblys halqyn elimizdiń azamattary men bolashaq urpaqtyń densaýlyǵyna qaýip tóndiretin esirtkiniń taralýynan týyndaıtyn jalpy problemadan tys qalmaýǵa, esirtki qylmysyna qarsy kúreste belsendi azamattyq ustanym tanytýǵa shaqyrady.