Tarazda esirtkini jarnamalaıtyn 100-den asa graffıtı óshirildi

TARAZ. QazAqparat – Jambyldyq polıtsııa qyzmetkerleri oblys ákimdiginiń Jastar saıasaty máseleleri basqarmasynyń qyzmetkerlerimen jáne eriktilermen birge turǵyn úıler men ǵımarattardyń qabyrǵalaryna kodtyq sózder men baılanys nómirleri jazylǵan graffıttılerdi óshirdi, dep habarlaıdy QazAqparat tilshisi.

Іs-shara nátıjesinde bir kúnniń ishinde qala boıynsha 100-den astam jazba joıyldy. Sondaı-aq, Jambyl oblysynyń PD Esirtki qylmysyna qarsy is-qımyl basqarmasynyń qyzmetkerleri ınternet jelisine kúndelikti monıtorıng júrgizý arqyly Telegram-da esirtkini jarnamalaǵan paraqshalardy anyqtady.

Qazirgi ýaqytta anyqtalǵan ınternet-paraqshalar buǵattalyp, olardy ashýǵa jáne jumys isteýine qatysy bar adamdardy anyqtap, ustaý boıynsha izdestirý sharalary júrgizilýde.

«Graffıtı jazýlardy engizgeni jáne ınternette kórsetilgen málimetterdi taratqany úshin QR QK 299-1-baby (Esirtki quraldaryn, psıhotroptyq zattardy nemese olardyń analogtaryn, prekýrsorlardy nasıhattaý nemese zańsyz jarnamalaý) boıynsha jaza kózdelgen. Osy qylmysty jasaǵany úshin úsh jylǵa deıingi merzimge bas bostandyǵynan aıyrý, aldyn ala sóz baılasý arqyly bir top adammen jasaǵany úshin úsh jyldan alty jylǵa deıingi merzimge bas bostandyǵynan aıyrý jazasy qarastyrylǵan», - delingen oblystyq Polıtsııa departamentiniń habarlamasynda.

Sondaı-aq, atalǵan departament oblys turǵyndaryn esirtki qylmysyna qarsy kúreste belsendi azamattyq ustanym tanytýǵa shaqyrady.