Tarazda esirtki jarnamalaıtyn graffıtı jazbalar jazǵan jigit ustaldy
TARAZ. QazAqparat - Tarazda sıntetıkalyq esirtki taratatyn adamdardy izdestirý jedel is-sharalary barysynda sıntetıkalyq esirtkini jarnamalaıtyn graffıtı jazbalar jasaǵan jigit ustaldy, dep habarlaıdy QazAqparat.
Atalmysh jedel is-sharalardy Jambyl oblysy Polıtsııa departamenti Esirtki qylmysyna qarsy is-qımyl basqarmasynyń qyzmetkerleri men Taraz qalasy Polıtsııa basqarmasynyń jergilikti polıtsııa qyzmeti birlese otyryp uıymdastyrǵan. Nátıjesinde úılerdiń qabyrǵalary men qorshaýlarynda esirtkiniń taralýyna qatysty graffıtı-jazbalar jazǵan 19 jastaǵy Taraz turǵyny qolǵa túsken.
«Ustalǵan azamat kinásin moıyndap, jaýapqa tartyldy. Sıntetıkalyq esirtkini taratýǵa qatysty basqa tulǵalardy anyqtaý boıynsha is-sharalar júrgizilýde. Qazirgi tańda anyqtalyp tabylǵan graffıtı-jazýlar joıyldy, túrli sıntetıkalyq esirtkini nasıhattaıtyn ınternet-saıttar buǵattaldy», - dep málimdedi oblystyq polıtsııa departamentiniń baspasóz qyzmeti.
Aıta keteıik, polıtsııa departamenti mamandary oblys turǵyndaryn esirtkiniń taralýyna yqpal etetin osyndaı qubylystardan tys qalmaýǵa, árbir derek boıynsha selqostyq tanytpaýǵa jáne esirtki qylmysymen kúreste belsendi azamattyq ustanym tanytyp, esirtki jarnamasyn taratýǵa jol bermeýge shaqyrýda.
