Tarazda emdik shóptermen emdeıtin fıto-bar ashyldy
Óńirde alǵash ret ashylyp otyrǵan ortalyqtyń saltanatty ashylýyna oblys ákimi Asqar Myrzahmetov qatysty. Fıto-barda aldaǵy ýaqytta kelýshilerge arnalyp emdik ósimdikterden daıyndalǵan túrli taǵamdar men sýsyndar, densaýlyqty jaqsartatyn dıetalyq ónimder usynylmaq.
«Jobany oblys basshysynyń ıdeıasymen qolǵa alyp, júrgizýdemiz. Bul jerde 100-den astam shóp túrleriniń emdik qasıetteri paıdalanylady. Ol shópter elimizdiń ár túkpirindegi taýly aımaqtardan teriledi. Munda negizinen emdik shópterden daıyndalǵan sháılarmen emdeý sharalary júrgizilmek. Al taǵamdar mázirinde dıetalyq ónimderge basymdyq beriledi. Emdik shópterdi paıdalanýda «Zerde-Fıto» JShS-men birlesip eńbek etpek»,-deıdi jeke kásipker Qadyrhan Abdýllaev .
Aıta keteıik, nysannyń ortalyq ǵımaratynyń aýmaǵy 700 sharshy metrdi qurasa, mańynda jalpy aýmaǵy 1,8 gektardy quraıtyn saıabaq ornalasqan. Munda barlyǵy 30-35 adam jumys atqarady. Olardyń qatarynda shóppen emdeıtin, pedıatr, terapevt dárigerleri bar. Ortalyqta táýligine 150-200 adamdy qabyldaýǵa múmkindik jasalǵan.
Sharanyń saltanatty ashylý rásiminde sóz alǵan medıtsına ǵylymdarynyń doktory, densaýlyq saqtaý isiniń úzdigi «Ǵylymı-klınıkalyq kardıohırýrgııa jáne transplantologııa ortalyǵynyń» dırektory Seıithan Joshybaev emdeý-saýyqtyrý ortalyǵynyń ereksheligi men paıdasyna toqtalyp, fıto-bar aldaǵy ýaqytta halyq densaýlyǵyn arttyrýǵa zor úles qosatynyna senim bildirdi.
