Tarazda Ekinshi dúnıejúzilik soǵys ardageri ómirden ozdy

ASTANA. KAZINFORM — Tarazda 105 jasqa qaraǵan shaǵynda Ekinshi dúnıejúzilik soǵys ardageri, maıdanger Grıgorıı Neşeretnev dúnıeden ótti. Dárigerler sońyna deıin onyń ómiri úshin kúreskenimen, ardagerdi aman alyp qalý múmkin bolmady, dep habarlaıdy Kazinform tilshisi.

Grıgorıı Vladımırovıch 1921 jylǵy 22 qarashada Jambyl oblysynyń Lýgovoı aýdanynda dúnıege kelgen. Balalyq shaǵy aýyr ótti: erte jasta anasynan aıyrylyp, ákesiz qalǵan ol qaryndasyna qamqor bolýǵa májbúr boldy.

Ekinshi dúnıejúzilik soǵys bastalǵanda óz erkimen maıdanǵa attanyp, Lenıngrad maıdanynda qorshaýda qalǵan qalany qorǵaýǵa atsalysty. 1944 jyldyń aqpan aıynda basy men aıaǵynan aýyr jaralanyp, alty aı áskerı gospıtalde emdelgennen keıin sol jyldyń kúzinde ásker qatarynan bosatyldy. Jeńisti tylda qarsy alǵanymen, onyń jeńiske qosqan úlesi el tarıhynyń ajyramas bóligi boldy.

Soǵystan keıingi jyldary otbasyn quryp, eki ul tárbıeledi. Alaıda taǵdyr oǵan taǵy da aýyr synaqtar daıyndady: aldymen jary, keıin uldary birinen soń biri ómirden ótti. Keıin ol ekinshi jaryn jolyqtyryp, qalǵan ǵumyrynda sonyń súıenishin kórdi. Ol kisi qaıtys bolǵan soń, ardagerge asyrandy qyzy Tatıana qamqor boldy, ol ógeı ákesin meıirim men jylylyqqa bólep ótti.

Grıgorıı Vladımırovıch tutas bir dáýirdi qamtyǵan uzaq ǵumyr súrdi. Soǵys, qaıǵy-qasiret pen syn-qaterler onyń rýhyn jasyta almady, qaıta shyńdaı tústi. Ómiriniń sońyna deıin oıy sergek, bolmysy bıik boldy.

Bir aptadan astam ýaqyt buryn ol jambas súıegin syndyryp, aýrýhanaǵa túsken. Dárigerler bar kúshin salǵanymen, ókinishke qaraı, ardager aýrýhanada kóz jumdy. 

Grıgorıı Neşeretnevtiń jarqyn beınesi batyldyqtyń, tózimniń jáne Otanǵa adaldyqtyń úlgisi retinde júrekterde máńgi saqtalady. Onyń taǵdyry – tiri tarıh, sózben ólsheýge kelmeıtin rýh kúshi. Jatqan jeri jaryq, rýhy peıishte bolsyn.

Osydan buryn ShQO-nyń Altaı aýdanynda qalǵan jalǵyz ardager qaıtys bolǵanyn jazǵan edik.