Tarazda eki iri sport kesheni ashyldy
TARAZ. QazAqparat – Táýelsizdik kúni Taraz turǵyndaryna erekshe syı jasaldy. Shaharda birden eki birdeı dene shynyqtyrý-saýyqtyrý kesheni ashyldy, dep habarlaıdy QazAqparat tilshisi.
Olardyń biri Qarasý yqshamaýdanynda ornalasqan. Munda №3 oblystyq mamandandyrylǵan balalar men jas óspirimder sport mektebiniń tálimgerleri jattyǵatyn bolady. Ekinshi keshen Shalǵaı Qarasý massıvinde boı kóterdi. Nysan «Jekpe-jek» kásipqoı sport klýbynyń balansyna ótkizildi.
Keshenderdiń ishinde fýtbol, basketbol, volleıbolǵa arnalǵan ámbebap zal, kúres pen trenajer zaldary bar.
Jambyl oblysynyń ákimi Berdibek Saparbaev turǵyndardy Táýelsizdik kúni men sport nysandarynyń ashylýy syndy qos qýanyshpen quttyqtady.
«Jambyl jeri – talaı sport tarlandaryna qanat bitirgen kıeli meken. Jaqsylyq Úshkempirov, Ermahan Ybraıymov, Baqtııar Artaev esimderi álemge áıgili. Bizdiń sportshylar el namysyn halyqaralyq arenalarda sátti qorǵaýda. Osy sport keshenderi de olımpıada chempıondarynyń kezekti tolqynyn ósirsin dep tileımin. Táýelsizdiktiń alǵashqy kúnderinen Tuńǵysh Prezıdent – Elbasymyz Nursultan Nazarbaev jastardy qoldaýǵa aıyryqsha mán berip keledi. Osy jyldary talaı jumystar atqaryldy. Qazir de jastardyń boıynda sportqa degen qushtarlyqty oıatý úshin barymyzdy salyp kelemiz. Osyndaı dene shynyqtyrý-saýyqtyrý keshenderi aýdandarda da ashylyp jatyr», - dep atap ótti Berdibek Saparbaev.
Aıta keteıik, Qarasý yqshamaýdanyndaǵy sport kesheniniń aldynda demalys aımaǵy salynatyn bolady.
Qos qýanyshqa qaraı izgi tilekterin QR Eńbek sińirgen jattyqtyrýshysy Jumahan Nuǵmanov pen 2016 jylǵy Olımpıada oıyndarynyń kúmis júldegeri Eldos Smetov te jetkizdi.
Aımaq basshysy keshenderdi aralap kórip, jas sportshylarmen tildesti. Olarǵa sáttilik tilep, syılyq retinde doptardy tartý etti.
Al dene shynyqtyrý jáne sport basqarmasyna jańa nysandardyń kúndelikti jumys isteýi men ǵımarattyń kútip ustalýyn baqylaýdy tapsyrdy.
Dzıýdo jattyqtyrýshysy Orazaly Ermekbaevtyń sózinshe, qazirdiń ózinde munda 70-80 bala jattyǵýǵa kep júredi eken.
«Balalar bul zaldy qatty unatyp qaldy. Іshi jyly, jaryq, eń bastysy, yńǵaıly. Bul sportshylar úshin úlken syı. Sporttyń damýyna zor yqpal eteri sózsiz»,- deıdi ol.
