Tarazda eki avtokólik túgi qalmaı janyp ketti
TARAZ. QazAqparat – Taraz qalasynda avtokóliktegi órt faktileri azaıar emes, dep habarlaıdy QazAqparat tilshisi oblystyq tótenshe jaǵdaılar departamentiniń baspasóz qyzmetine silteme jasap.
Avtokóliktiń janýynyń negizgi sebepteri - elektr symdarynyń qysqa tuıyqtalýy, otyn berý júıesiniń aqaýlary.
Degenmen sońǵy ýaqytta avtokólikte nemese oǵan jaqyn jerde temeki shegý jáne avtokólik motoryn jylytý kezinde ashyq otty paıdalaný sekildi áreketter de órtke sebep bolyp otyr.
Atap aıtsaq, sondaı sebeppen Taraz qalasy, Sýhanbaev kóshesinde jeńil avtokólik órtengen. Oqıǵa ornynda órt sóndirý qyzmetiniń jeke quramynan 2 avtokólik jáne 8 órt sóndirýshi jumys atqaryp, órtti 4 mınýt ishinde óshirgen.
Sondaı-aq, Taraz qalasy Zapadnaıa kóshesinde jeńil avtokólik órtendi. Órt sóndirýshiler oqıǵa ornyna jetken soń avtokóliktegi órtti 6 mınýtta aýyzdyqtaǵan. Shaqyrtý ornynda Jambyl oblysy Órt sóndirý qyzmetiniń 2 avtokóligi men 9 órt sóndirýshi jumys atqarǵan. Joǵaryda atalǵan órt oqıǵalarynan zardap shekkender joq.
«Órt saldarynan eki jeńil avtokólik te joıyldy. Qazirgi ýaqytta azamattyq qorǵaý qyzmetkerleri órttiń shyǵý sebebin anyqtap jatyr» delingen vedomstvo habarlamasynda.
Mamandar júrgizýshilerdi asa saq bolýǵa shaqyrady.
