Tarazda eki aptaǵa karantınge jabylǵan úıde koronavırýs basqa eshkimge juqqan joq
TARAZ. QazAqparat – Taraz qalasynda 7 sáýir kúni karantınge jabylǵan kóppáterli turǵyn úıdiń bir kireberisi ashyldy, dep habarlaıdy QazAqparat Taraz qalasy ákimdigine silteme jasap.
Taraz qalasynda 7 sáýir kúni koronavırýs ınfektsııasyn juqtyrǵan 86 jastaǵy áıel tirkelip, naýqas anyqtalǵan «Qarasý alqaby» shaǵynaýdanyndaǵy kóppáterli turǵyn úıdiń kireberisi karantınge jabylǵan bolatyn. Epıdemıologııalyq tekserý barysynda turǵynnyń 17 naýryz kúni Almaty qalasynan kelgen jaqyn týysymen baılanysta bolǵany anyqtalyp, ol ınfektsııalyq statsıonarǵa jatqyzylǵan. Al, onymen baılanysta bolǵan 5 adam anyqtalyp, olar da karantınge ornalastyryldy.
Atalǵan turǵyn úıdiń kireberisinde jáne turǵynnyń turǵylyqty jeri boıynsha dezınfektsııalyq óńdeý sharalary júrgizilgen. Osy kireberistegi páterlerde turatyn turǵyndar 14 kúnge oqshaýlanyp, olarǵa úıinen shyǵýǵa tyıym salynǵan bolatyn.
Taraz qalalyq taýarlar men kórsetiletin qyzmetterdiń sapasy men qyzmetterin baqylaý basqarmasy basshysynyń orynbasary Ǵabıt Ábdildániń aıtýynsha, bul kireberiste oqshaýlanǵan 26 turǵynnyń 11-i 18-ge tolmaǵan balalar, al 15-i eresek adamdar. Osy 14 kún ishinde olardyń densaýlyq jaǵdaılary jergilikti emhanada baqylanyp, eshqandaı aýytqý belgileri baıqalmaǵan.
Oqshaýlanǵan kireberistiń turǵyndaryna eki apta páterlerinen shyǵýyna tyıym salynyp, osy aralyqta Taraz qalasynyń ákimdigi páter turǵyndaryn azyq-túlik ónimderimen qamtamasyz etken. Búgin Taraz qalasynyń ákimdigi sol «Qarasý alqaby» shaǵynaýdanyndaǵy turǵyn úı kireberisiniń karantındik rejıminiń aıaqtalǵanyn málimdedi. Karantınge jabylǵan turǵyndarǵa tek jergilikti bılik qana emes, kásipkerler men belsendi azamattar da qoldaý kórsetken bolatyn.
«Biz sanepıdqadaǵalaý mekemesiniń talaptaryna saı 14 kún boıy úıden shyqpaı, medıtsına qyzmetkerleriniń kúndelikti baqylaýynda boldyq. Sonyń arqasynda basqa eshkimnen vırýs shyqqan joq. Osy 14 kún ishinde qala ákimdigi men demeýshilerdiń kómegimen bizge kúndelikti azyq-túligimiz ben ystyq tamaǵymyz jetkizilip otyrdy. Sol úshin azamattarǵa alǵysymyzdy aıtamyz», - dedi atalǵan turǵyn úıdiń turǵyny Aıagóz Maılıev.
