Tarazda eki adamnyń ómirin jalmaǵan kólik apaty boldy
TARAZ. QazAqparat - Tarazda búgin adam shyǵyny bolǵan jol-kólik apaty oryn aldy, dep habarlaıdy «QazAqparat» HAA tilshisi.
«29 jeltoqsan kúni saǵat 01:30 shamasynda, Jambyl oblystyq ІІD JPQ jol patrýldik polıtsııa batalonynyń kezekshilik bólimine adam qaza tapqan jol-kólik apaty týraly aqparat kelip tústi, - dep aıtylady Jambyl oblystyq ІІD baspasóz qyzmetiniń habarlamasynda. - Aldyn ala nusqalar boıynsha, «BMV 520» avtomashınasynyń K. esimdi júrgizýshisi dońǵalaǵynyń jarylýy saldarynan róldi basqara almaı, qarsy jolaqqa shyǵyp ketip, turǵyn úıdiń mańynda ornalasqan kópirdiń qorshaýyna soǵylǵan. Sodan keıin atalǵan kólikti metall qubyrǵa tastap ketken. Kólik apaty kezinde tas joldyń atalmysh aýmaǵyna birinshi kelgen jergilikti polıtsııa qyzmetiniń jol patrýldik polıtsııanyń batalony baqylaý-qadaǵalaý jumysyn atqardy, keıinnen jedel-járdem qyzmeti keldi».
Oqıǵa bolǵan jerde dene zaqymyn alǵan 31 jastaǵy I. esimdi jolaýshy qaza tapty; 29 jasar M. esimdi azamat №1 qalalyq aýrýhanasynyń naýqastardy qabyldaý bóliminde kóz jumdy. Basqa eki jolaýshy - 23 jastaǵy A. jáne 37 jasar Sh. «bastyń zaqymy» dıagnozymen №1 qalalyq aýrýhanasyna jetkizilip, kómek kórsetilgen soń úılerine jiberildi. 22 jastaǵy K. esimdi júrgizýshi Taraz qalasynyń turǵyny, jol-kólik apaty kezinde kóptegen jaraqattar alyp, qatty salqyn tıgen. Ol da birinshi qalalyq aýrýhanaǵa jetkizildi.
Bul derek QR QK «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» 345-baby boıynsha STBR-ǵa tirkeldi.
Osy derekter boıynsha sotqa deıingi tergeý jumystary júrgizilýde.
