Tarazda eki shaǵynaýdan turǵyndary kúzge deıin ystyq sýsyz qaldy
ASTANA. KAZINFORM — Taraz qalasynda josparly jóndeý jumystaryna baılanysty eki shaǵynaýdanda 2026 jyldyń qazanyna deıin ystyq sý bolmaıdy, dep habarlaıdy Kazinform tilshisi.
Qalada ystyq sýdy josparly túrde óshirýdiń bir aılyq kezeńi aıaqtalyp, jylý energetıkteri turǵyn úılerdi kezeń-kezeńimen qaıta qosa bastady. Alaıda qalanyń eki shaǵynaýdanynyń turǵyndary kúzdiń ortasyna deıin kútýge májbúr bolady.
15 sáýirden beri jalǵasqan gıdravlıkalyq synaqtar men qazandyqtardy jóndeý jumystary túrindegi bir aılyq kezeń artta qaldy. 14 mamyrdan bastap ystyq sý qala turǵyndarynyń páterlerine kezeń-kezeńimen berile bastaıdy.
Jalpy qalada ortalyqtandyrylǵan ystyq sýmen qamtylǵan 1039 kópqabatty úı bar. Onyń 942-sine «Taraztransenergo» MKK qyzmet kórsetse, 97 úı «Jambyl-Jylý» mekemesiniń qaraýynda.
Júıe jalpy iske qosylǵanyna qaramastan, Samal jáne Alataý shaǵynaýdandaryndaǵy 100 kópqabatty úı úshin jaǵdaı kúrdeli kúıinde qalyp otyr. Resmı málimet boıynsha, bul jerde 2026 jyldyń 1 qazanyna deıin ystyq sý bolmaıdy.
Ystyq sýdy keshiktirip berýdiń eki sebebi aıtyldy: magıstraldyq M-3 jylý jelisin qaıta jańǵyrtý jumystarynyń ekinshi kezeńi bastalǵan, sondaı-aq Samal men Alataý shaǵynaýdandaryndaǵy ishki jylý qubyrlary qatty tozǵan. Osyǵan baılanysty olardy jańǵyrtý jobalaryn júzege asyrý josparlanǵan.
Áleýmettik jelilerde narazylyq tolqyny bastaldy. Turǵyndar ashýǵa býlyǵyp, jóndeýge nege sonshalyqty kóp ýaqyt qajet ekenin túsindirýdi talap etip, ákimdikten protsesti qalaı da jedeldetýdi surap jatyr. Qalalyq bılik turǵyndardy jaǵdaıdy túsinistikpen qabyldaýǵa shaqyrady.
Buǵan deıin Jambyl oblysynyń Shý aýdanynda jalpy uzyndyǵy 263 shaqyrymnan asatyn 42 kanaldy rekonstrýktsııalaý jáne betondaý jumystary bastalǵany habarlanǵan.
