Tarazda eki norvegııalyq áıel murasynan aıyrylyp qala jazdady
ASTANA. KAZINFORM – Tarazda Norvegııada turatyn eki áıel ákesinen qalǵan muradan aıyrylyp qala jazdady. Buǵan olardyń senimhattaryndaǵy tegi aǵylshyn tilinde jazylǵany sebep bolǵan, dep habarlaıdy Kazinform tilshisi.
Áıelderdiń ákesi 2024 jylǵy qazanda qaıtys bolǵan. Onyń qaıtys bolǵany týraly habar qyzdaryna tórt aıdan keıin ǵana jetken. Osy ýaqytqa deıin zańda belgilengen murany qabyldaý merzimi aıaqtalýǵa jaqyndap, qajetti qujattardy qashyqtan rásimdeý de qıynǵa soqqan.
Shetelde rásimdelgen senimhattar da qosymsha kedergi bolǵan. Notarıýs muragerlerdiń tegi aǵylshyn tilinde kórsetilgendikten qujattardy qabyldaýdan bas tartqan. Keıin áıelderge muragerlik quqyǵy týraly kýálik berilmegen.
Óz quqyqtaryn qalpyna keltirý úshin olar Taraz qalalyq sotyna talap aryzben júgingen.
Іsti qaraý barysynda sot talap qoıýshylardyń birinshi kezektegi muragerler ekenin anyqtady. Olarmen birge ákesiniń múlkine úshinshi qyzy da úmitker bolǵan. Osy kezektegi basqa muragerler bolmaǵan.
Sonymen qatar muraǵa qatysty otbasy ishinde daý týyndamaǵan. Úshinshi qyzy ápkeleriniń talabyn tolyq qoldap, ótkizip alǵan merzimdi qalpyna keltirýge qarsy bolmaǵan.
Sot áıelderdiń turaqty túrde shetelde turatynyn, ákesiniń qaıtys bolǵany týraly der kezinde habar almaǵanyn jáne qujattardy rásimdeý kezinde obektıvti qıyndyqtarǵa tap bolǵanyn eskerip, bul mán-jaılardy dáleldi sebep dep tanydy.
Nátıjesinde sot murany qabyldaý merzimin qalpyna keltirip, áıelderdi ákesiniń murasyn qabyldaǵan muragerler dep tanydy.
Sot sheshimi zańdy kúshine endi.
Eske sala ketsek, buǵan deıin múgedektikti rásimdeý úshin qandaı qujattar qajet jáne qandaı talaptar bar ekenin jazdyq.
