Tarazda bala tárbıesine salǵyrt qaraǵan anaǵa 64 myń teńge aıyppul salyndy
TARAZ. KAZINFORM — Jambyl oblysynda kámeletke tolmaǵan eki balasynyń kózinshe ishimdik iship, olardy tárbıeleý mindetin birneshe ret oryndamaǵan áıelge 64 875 teńge aıyppul salyndy.
Kámeletke tolmaǵandardyń isteri jónindegi mamandandyrylǵan aýdanaralyq soty azamatsha B.-ǵa qatysty ákimshilik isti qarady.
Sot materıaldaryna sáıkes, 2026 jyldyń tamyzynda Jambyl oblysy Moıynqum aýdanynyń turǵyny jubaıymen birge Taraz qalasynda ýaqytsha turyp jatqan úıinde ortasha dárejede mas kúıinde bolǵan. Úıde onyń 2024 jáne 2025 jyly týǵan eki balasy da bolǵan. Bul týraly polıtsııaǵa kórshileri habarlaǵan.
Tekserý kezinde úıdiń sanıtarııalyq jaǵdaıy talapqa saı emestigi jáne balalardyń qalypty damýyna qajetti jaǵdaılardyń tolyq jasalmaǵany anyqtalǵan.
Sonymen qatar sot áıeldiń osy aıdyń basynda ata-analyq mindetterin oryndamaǵany úshin ÁQBtK-niń 127-baby 1-bóligi boıynsha jaýapqa tartylǵanyn anyqtady.
Sot otyrysynda azamatsha B. balalardyń kózinshe jubaıymen birge ishimdik ishkenin moıyndap, kinásin tolyq rastady.
ÁQBtK-niń 127-baby 2-bóligi boıynsha mundaı quqyq buzýshylyq úshin 15 AEK kóleminde aıyppul salý nemese bes táýlikke deıin ákimshilik qamaqqa alý qarastyrylǵan.
Sot kináni moıyndaýdy jáne kámeletke tolmaǵan balalarynyń bolýyn jeńildetetin mán-jaı retinde eskerdi.
— Nátıjesinde áıel osy bap boıynsha kináli dep tanylyp, oǵan 15 AEK, ıaǵnı 64 875 teńge aıyppul salyndy. Sot qaýlysy zańdy kúshine endi, — delingen sot taratqan aqparatta.
Osydan buryn Astanada jańa týǵan balany zańsyz bergeni úshin anasy ata-ana quqyǵynan aıyrylǵanyn jazǵanbyz.
