Tarazda durys tamaqtaný ortalyǵy ashyldy
Durys tamaqtaný ortalyǵynyń jetekshisi, Jambyl oblystyq kópsalaly aýrýhanasynyń dıetology Baıan Baımuratovanyń aıtýynsha, ortalyqta azamattarǵa durys tamaqtaný boıynsha aqparat beriledi.
«Búginde durys tamaqtaný máselesi ózekti bolyp otyr. Bul qorshaǵan ortanyń buzylýyna, organızmge qorektik zattardyń jetkiliksiz túsýine jáne durys tamaqtanbaýǵa baılanysty. Ortalyqta dıetolog, endokrınolog, gastroenterolog jáne kardıolog mamandarynyń keńesi uıymdastyrylǵan. Óıtkeni, durys tamaqtanbaý úrdisi metabolızmdi buzady, bul semizdikke, qant dıabetine, asqazan-ishek joldary men júrek-tamyr júıesiniń aýrýlaryna ákelýi múmkin» deıdi Baıan Baımuratova.
Kez kelgen adam ortalyqqa kelip, durys tamaqtaný máseleleri boıynsha qajetti usynystar ala alady. Mysaly, semizdikke shaldyqqandarǵa sarapshylar taǵamdy salmaǵyna, boıyna, jasyna jáne jynysyna qaraı taǵaıyndaıdy.
Sondaı-aq, mamandar koronavırýstan aıyqqan patsıentterge aǵzany qalpyna keltirýge, dárýmender paıdalalanýǵa, kúrdeli otalardan keıingi naýqastarǵa em-dom túrlerin tańdaýǵa kómek beredi.
«Durys tamaqtaný ortalyǵyn ashý qajettiligi áldeqashan pisip jetilgen. Bizdiń azamattarymyz ónimdi tańdaýǵa sanaly túrde júginýi kerek. Salaýatty ómir saltyn ustanǵan adam durys tamaqtanýǵa den qoıǵany abzal. Biz tutynatyn nárseniń bári deneniń jaı-kúıine, kóńil-kúıge, jumysyna áser etedi. Ortalyq «Zer-Kúmis» JShS bastamasymen jáne tikeleı qoldaýymen ashylǵanyn atap ótkim keledi» dep atap ótti oblystyq densaýlyq saqtaý basqarmasynyń basshysy Áset Qalıev.
Atalǵan seriktestik dırektory Zaıda Arynbaeva óz uıymynyń ortalyqqa arnap durys tamaqtaný úshin túrli dıetalar týraly nusqaýlyqtar, býkletter daıyndaǵanyn aıtyp ótti.
