Tarazda dúkenge ketken 14 jasar qyz iz-túzsiz joǵalǵan
TARAZ. QazAqparat – Tarazda úıden ketip qalǵan 14 jastaǵy jasócpirim qyz tabyldy, dep habarlaıdy QazAqparat tilshisi.
Taraz qalasynyń polıtsııa basqarmasy 2-polıtsııa bóliminiń kezekshi bólimine oblys ortalyǵynyń 34 jastaǵy jergilikti turǵyny habarlasyp, 14 jasar qyzy habar-osharsyz ketkenin aıtyp júgingen.
Áıeldiń aıtýynsha, kámeletke tolmaǵan jasóspirim qyz dúkenge ketip, qaıta oralmaǵan.
Habarlamany alǵan polıtseıler tolyq quramda kórsetilgen mekenjaıǵa jol tartty.
Tártip saqshylary qyz bara alatyn jaqyn mańdaǵy aýmaqtardy aralap, qajetti izdestirý is-sharalaryn júrgizdi.
Jasóspirim qyzdy izdeýge eriktiler men janashyr turǵyndar qosyldy. Polıtsııa qyzmetkerleri qabyldaǵan jedel is-sharalar nátıjesinde joǵalǵan qyz Taraz qalasyndaǵy kóshelerdiń birinen tabyldy.
Belgili bolǵandaı, ol anasymen urysyp, ókpe-renish negizinde úıden ketken. Óz kezeginde ata-ana qyzyn aman-esen tapqan polıtsııa qyzmetkerlerine úlken alǵysyn bildirdi.
«Aıta keterligi, statıstıkalyq málimetterge sáıkes, 2021 jyldyń bes aıynda 82 jasóspirim úıinen ketken, 10 derek boıynsha izdeý jumysy júrgizilgen. Olardyń úıden ketý sebepteri ártúrli, onyń ishinde ata-anasymen janjaldasýyna baılanysty ketýdiń – 16 deregi, ata-ananyń baqylaýynsyz qydyrýdyń – 16 deregi jáne basqa sebeptermen baılanysty – 50 derek: adasyp ketý, uzaq ýaqyt qydyrý nemese ata-anasyna aıtpaı jaqyn týystaryna ketip qalý. Barlyq jasóspirim tabylyp, úıine qaıtaryldy, olardy zańsyz ortaǵa tartý derekteri anyqtalǵan joq», – dedi PD JPQB bastyǵy Rahymberdi Áshkeev.
