Tarazda dúkenderdi buzyp kirip, temeki ónimderin urlaǵandar ustaldy
TARAZ. QazAqparat – Taraz qalasynda «Kommýnaldyq bazar jáne «Nuraly» bazarlarynyń aýmaǵynda ornalasqan azyq-túlik dúkenderine buzyp kirip, urlyq jasaǵan kúdiktiler qolǵa tústi,- dep habarlaıdy QazAqparat tilshisi.
Buzaqylar jalpy somasy 770 000 teńge kólemindegi temeki ónimderin urlaǵan. Atalǵan derekke qatysty QR QK 188-babynyń 3-bóligi (urlyq) boıynsha sotqa deıingi tergeý amaldary bastaldy. Bul oblystyq polıtsııa departamentiniń baspasóz qyzmeti habarlady.
«Jedel-izdestirý jáne arnaıy is-sharalardy ótkizý barysynda Taraz qalasynyń PB 1-polıtsııa bóliminiń krımınaldyq polıtsııa bólimshesi qyzmetkerleriniń jedel is-áreketteriniń nátıjesinde urlyq jasady degen kúdikpen osyndaı qylmystary úshin birneshe ret jaýapqa tartylǵan Taraz qalasynyń 20 jáne 22 jastaǵy turǵyndary anyqtalyp, izin sýytpaı ustaldy»,-delingen vedomstvo habarlamasynda.
Kúdiktiler urlyqtyń tórt deregi boıynsha kinásin moıyndady, qazirgi tańda atalǵan tulǵalardyń basqa da qylmystarǵa qatystylyǵy tekserilýde.
Polıtseıler oblys ortalyǵynyń kásipkerlerine bıznes nysandaryn dabyl sıgnalızatsııalarymen, sondaı-aq syrtqy beıne baqylaý kameralarymen jabdyqtaý qajettiligin eskertýde.
