Tarazda soqqyǵa jyǵylǵan depýtattyń isine qatysty mán-jaı anyqtalyp jatyr

TARAZ. KAZINFORM – Keshe keshke Almaty oblysy Іle aýdandyq máslıhatynyń depýtaty, zańger Nurlan Baıǵazıev Taraz qalasynyń ortalyǵynda soqqyǵa jyǵyldy.

Qazaqstandyq BAQ-ta Baıǵazıevtiń esimi birneshe apta buryn polıtseılerdiń kámeletke tolmaǵan qyzǵa kóligine minýge usynyp jatqany túsirilgen beıneni jarııalaǵannan keıin shyqty. Tekseristen keıin polıtsııa qyzmetkerleri jumystan bosatyldy.

Tarazda zańger klıentpen kezdesýde bolǵan. Saǵat 18:00 shamasynda belgisiz bireýmen sózge kelip qalyp, soqqyǵa jyǵylady. 

Oqıǵa basynda depýtat týdyrǵan atyshýly oqıǵamen baılanystyryldy, biraq mán-jaı búgin tańerteń jelide paıda bolǵan janjal vıdeosynan keıin aıqyndaldy.

Qoǵamdyq tamaqtaný ornynda qolynda balasy bar áıel otyrǵan dıvannyń janynda eki er adam janjaldasyp turady. Tóbeleske telefondy qýattaǵysh qural sebep bolǵan. Advokat telefonyn er adam men áıeli otyrǵan oryndyqtyń qasynda qýattamaq bolǵan. Alaıda bul erli-zaıyptylarǵa unamaǵan.

Oqıǵadan keıin depýtat aýrýhanaǵa jetkizildi.

Jambyl oblysy polıtsııa departamenti baspasóz qyzmetiniń málimetinshe, osy oqıǵa boıynsha is qozǵaldy.

- Oqıǵaǵa qatysy bar adam anyqtalyp, polıtsııaǵa jetkizildi. Atalǵan fakti boıynsha QR Qylmystyq kodeksi 293-babynyń 1-bólimi (buzaqylyq) boıynsha sotqa deıingi tergeý amaldary bastaldy. Qazirgi ýaqytta qylmystyq is boıynsha oqıǵanyń barlyq mán-jaıyn jan-jaqty jáne obektıvti anyqtaýǵa baǵyttalǵan qajetti jedel-izdestirý sharalary júrgizilip jatyr, - dep jaýap berdi vedomstvodan.

Osyǵan deıin Jambyl oblysynda balabaqsha basshylyǵy bıýdjetten 45,2 mln teńge jymqyrǵany týraly jazdyq.