Tarazda burynǵy perzenthana ınfektsııalyq aýrýhana bolyp qaıta ashylady
TARAZ. QazAqparat – Jambyl oblysynyń ákimi Berdibek Saparbaev jumys barysymen Taraz qalasyndaǵy densaýlyq saqtaý nysandaryn aralady. Eń aldymen aımaq basshysy Tarazdaǵy kópbeıindi aýrýhananyń ınfektsııalyq blogynyń jaı-kúıin barlady, dep habarlaıdy QazAqparat tilshisi oblys ákimdiiginiń resmı saıtyna silteme jasap.
Kezinde perınataldyq ortalyq bolǵan ǵımarat biraz ýaqyt bos turǵan edi. Endi qazir munda kúrdeli jóndeý jumystary qolǵa alynǵan. Joba boıynsha, munda 200 tósek orynǵan arnalǵan ınfektsıondy statsıonar bolmaq. Qazirgi ýaqytta 100 medıtsınalyq fýnktsıonaldy kereýet satyp alyndy.
Sondaı-aq, qan gazdary men elektrolıtterdi anyqtaýǵa arnalǵan bir avtomatty analızator, ottegi stantsııasy, kompıýterlik tomograf, 50 medıtsınalyq fýnktsıonaldy kereýet jáne 30 reanımatsııalyq tósek satyp alý kózdelip otyr.
Merdiger «Talas-qurylys» JShS búginde jumystyń 90 paıyzyn aıaqtaǵan. Іshindegi kommýnaldyq jelilerdi tolyǵymen jańartypty. Ǵımaratty aralap shyqqan Berdibek Saparbaev nysannyń mańyzdylyǵyn erekshe atap ótti.
«Erteń indettiń ekinshi tolqyny bola qalǵan jaǵdaıda biz daıyn bolýymyz kerek. Myna ǵımarat arqyly naýqastarǵa kómek berý qaýqarymyz artady. Eń bastysy sapaly jumys atqarylýy kerek. Bul jóndeý jumystaryna nemquraıly qaraýǵa bolmaıdy»,- dep eskertti oblys ákimi.
Aımaq basshysy sondaı-aq aýrýhana aýlasyn kógaldandyrýǵa da mán berdi. Merdiger barlyq jumystardy 17-shi qarashaǵa deıin aıaqtaýy tıis.
Berdibek Saparbaev sondaı-aq, kóp beıindi aýrýhananyń negizgi korpýsyna da arnaıy bardy. Palatalardy aralap, emdeý mekemesniń materıaldyqtehnıkalyq jabdyqtalýyn óz kózimen kórdi. Aımaq basshysyna jaqynda ǵana kelgen úsh túrli ókpeni jasandy jeldetý apparattary kórsetildi. Bir ereksheligi, aýrýhananyń ózinde ottegi stantsııasy bar. Sol arqyly ishtegi kontsentratorlar naýqastarǵa qajetti ottegi kólemin berýge qaýqarly.
Oblys ákimi emdeý mekemesiniń tirkeý ornyna kelip, túsken naýqastan alynǵan PTR-synama qansha ýaqytta daıyn bolatynyn surady. Ondaǵy qyzmetker sońǵy alynǵan nátıjeni qaǵaz betine shyǵaryp kórsetti. Oǵan sáıkes, tańerteń alynǵan synamanyń nátıjesi tústen keıin shyǵatyny kórsetilgen.
Berdibek Saparbaev aýrýhananyń dári-dármek qoryn tekserdi. Oǵan jaýapty qyzmetkerler qazan aıyna qajet bolǵan dárilik zattar tolyǵymen jetkizilip, qazir qarasha aıyna berilgen tapsyrystar jetkizilip jatqanyn aıtty. Keı dárilik zattardyń - 1,5, al keıbiriniń 3-4 aıǵa deıin jetetin qory bar eken.
Saıa SEMBAI
