Tarazda buryn sottalǵan 33 azamat qaıta qamaldy

TARAZ. QazAqparat-Tarazda buryn sottalyp, esepte turǵan 33 azamatty qaıta qamaý týraly sot sheshimi shyqty, dep habarlaıdy QazAqparat.

Resmı málimetke qaraǵanda, Jambyl oblysynda jyl basynan beri oryn alǵan urlyqtyń 80 paıyzǵa jýyǵyn esepte turǵandar jasaǵan. Quzyrly organ probatsııalyq baqylaý ornatqan azamattardyń qylmys jasaýyn boldyrmaý sharalaryn júrgizgenimen, nátıje mardymsyz. Bul týraly óńirdegi probatsııa qyzmetiniń bastyǵy, ádilet podpolkovnıgi Ásel Kabýlova aıtty.

«Byltyr 2 myńnan astam sottalǵan azamat probatsııalyq baqylaýdan ótti. Dál qazir Jambyl oblysy aýmaǵynda 1568 adam esepte tur. Onyń ishinde kámeletke tolmaǵandardyń sany – 15. Bıyl 3 aı ishinde esepte turǵandar 14 qylmys jasaǵan. Onyń basym bóligi urlyq. Probatsııa qyzmetkerleri osyny eskerip, 100-den asa materıaldy sotqa joldaǵan Onda arnaıy esepke alynsa da, qaıta qylmys jasaǵan azamattardy túzeý mekemesine qamaýǵa alý usynylǵan. Soǵan sáıkes, 33 tulǵaǵa qatysty is qanaǵattandyrylyp, olar qamaýǵa alyndy», – deıdi ol.

Quqyq qorǵaý organy qyzmetkeriniń aıtýynsha, urlyqqa baratyndardyń kóbisi buryn sotty bolǵan.

Aıta keteıik, buǵan deıin Tarazdaǵy klýbtardy ózderiniń «kúzet qyzmetin» paıdalanýǵa májbúrlegen qylmystyq top ustalǵanyn jazǵan bolatynbyz.