Tarazda blokpostty kesip ótpek bolǵan júrgizýshi ustaldy
TARAZ. QazAqparat – Tarazda tótenshe jaǵdaı rejımin buzyp, blokpostty kesip ótpek bolǵan turǵyn ustaldy, dep habarlaıdy QazAqparat.
Jambyl aýdany Jalpaqtóbe aýylynda ornalasqan blokpostta Grodekovo aýylyna bara jatqan 24 jasar júrgizýshi tótenshe jaǵdaı rejımin buzǵan. Bul týraly oblystyq polıtsııa departamentiniń baspasóz qyzmeti habarlady.
«Júrgizýshi blok-bekettegi polıtsııa qyzmetkerlerine qajetti qujattardy usynǵanymen, mindetti sanıtarlyq-aldyn alý is-sharalarynan ótý, ıaǵnı dene qyzýyn ólsheý talabyn oryndaýǵa qarsylyq tanytqan. Polıtsııa qyzmetkerleri ony óz betimen blokposttan ótýge áreket jasaǵan kezinde ustady. Anyqtalǵandaı, bul buzýshylyq júrgizýshiniń jaýapsyz minez-qulqymen baılanysty oryn alǵan», delingen vedomstvo hattamasynda.
Aıta keteıik, tótenshe jaǵdaı rejımin buzǵan júrgizýshige QR ÁQBtK-niń 476-baby 6-bóligi boıynsha ákimshilik hattama rásimdeldi.
