Tarazda blok bekettegi tártip saqshysyn urǵan er adam qamaýǵa alyndy
TARAZ. QazAqparat - Taraz qalasynda tótenshe jaǵdaı kezinde tártip saqshysyna qol jumsaǵan er adam qamaldy, dep habarlaıdy QazAqparat.
1 sáýirde Baızaq aýdanyndaǵy blok bekette koronovırýs pandemııasynyń taralýyn boldyrmaý maqsatynda kólikterdi tekserý barysynda, kezekshiliktegi Taraz qalasy Polıtsııa basqarmasy jergilikti polıtsııa qyzmetiniń ınspektory Almaty qalasy baǵytyndaǵy «Toyota Corolla» markaly avtokóligin toqtatqan. Atalǵan avtokóliktegi jolaýshy er adam talapqa baǵynbaı, polıtsııa qyzmetkerine jaraqat keltirgen. Bul týraly oblystyq polıtsııa departamentiniń baspasóz qyzmeti habarlady.
«Taraz qalasynyń 34 jastaǵy turǵyny polıtsııa qyzmetkeriniń tótenshe jaǵdaı talaptaryna sáıkes, tıisti qujatsyz blok beketinen ótkizbeı, shekteý qoıǵanyna qarsy shyǵyp, onyń betinen judyryqpen urǵan. Kúdikti kinásin moıyndap, QR QPK-niń 128-babymen Tarazdaǵy ýaqytsha ustaý ızolıatoryna qamaldy. Ustalǵan er adam buryn birneshe ret sotty bolǵan», delingen habarlamada.
Qazirgi ýaqytta atalǵan derekke qatysty QR Qylmystyq kodeksiniń 379-baby (tótenshe jaǵdaı jarııalanǵan jerde bılik ókiliniń zańdy talabyna baǵynbaý) jáne 380-babymen (bılik ókiline qarsy kúsh qoldaný) sotqa deıingi tergeý amaldary júrgizilýde.
