Tarazda bıyl medıtsınalyq kolledj ben mektep-gımnazııa ashylady
TARAZ. QazAqparat – Tarazda aǵymdaǵy jyly mektep-gımnazııasy men medıtsınalyq kolledj ashylady, - dep habarlaıdy QazAqparat Jambyl oblysy ákimdiginiń resmı saıtyna silteme jasap.
Aǵymdaǵy jyly Jambyl oblysy ortalyǵynda «Keleshek Taraz» ǵylymı-zııatkerlik mektep-gımnazııasyn jáne «Arý-Ana» medıtsınalyq kolledjin ashý kózdelýde. Bilim berý jobalary memlekettik-jekemenshik áriptestik aıasynda burynǵy «Áýlıe-Ata» Jambyl gýmanıtarlyq-tehnıkalyq ýnıversıteti bazasynda iske asady dep kútilýde.
Senbi, 21 naýryz kúni Jambyl oblysynyń ákimi Berdibek Saparbaev 2014 jyly óz qyzmetin toqtatqan atalǵan joǵarǵy oqý ornynyń ǵımarattaryna bardy. Sodan beri materıaldyq-tehnıkalyq bazamen qamtylǵan, jalpy aýdany 18 myń sharshy metrden asatyn úsh korpýstyń jumysy toqtap tur. Menshik ıesi munda 1200 oryndyq mektep-gımnazııa men orta býyndaǵy medıtsınalyq qyzmetkerler daıyndaıtyn kolledj qurýǵa 700 mıllıon teńgeden astam qarajat salýdy josparlap otyr.
Oblys ákimi atalǵan jobalardy maquldap, óńirde joǵary sapaly bilim beretin jańa oqý oryndaryn qurýdyń mańyzdylyǵyn atap ótti.
Sondaı-aq, Berdibek Saparbaev buryńǵy «Taraz» qonaqúıiniń eski ǵımaratynda ornalasqan Taraz ınnovatsııalyq-gýmanıtarlyq ýnıversıtetiniń «Stýdentter úıinde» boldy. Ótken jyly qonaqúı ǵımaraty jóndelip, 500 oryndyq stýdenttik jataqhana bolyp qaıta jabdyqtalǵan. Jataqhanada kovorkıng-ortalyq, májilis, elektrondy oqytý zaldary, beınestýdııa, kınozal jáne ashana, sonymen qatar basqa qalalardan kelgen stýdentterdiń jaıly ornalasýyna arnalǵan basqa da bólmeler bar.
Budan soń aımaq basshysy Taraz qalasyn abattandyrý jáne jańa áleýmettik, ınnovatsııalyq nysandardyń qurylysy boıynsha aldaǵy ýaqytta júzege asatyn baıandy jobalarmen tanysty.
